28 июнь куни Президент Шавкат Мирзиёев амалий ташриф билан мамлакатда бўлиб турган Туркия Республикаси вице-президенти Фуат Октайни қабул қилди. Бу ҳақда президент матбуот хизмати хабар берди.
Учрашувда икки мамлакат амалий ҳамкорлигини янада кенгайтириш ҳамда етакчи корхона ва компанияларнинг янги кооперация лойиҳаларини илгари суриш масалалари муҳокама қилинди.
Ўзбекистон президенти Туркия билан дўстлик, ишонч ва стратегик шериклик муносабатларида олий даражадаги мунтазам ва сермаҳсул мулоқот туфайли эришилган бугунги даражани юксак баҳолади.
Туркия вице-президенти Фуат Октай илиқ қабул учун миннатдорлик билдирди ҳамда Туркия президенти Режеп Таййип Эрдоғаннинг самимий саломи ва энг эзгу тилакларини етказди. Туркия компания ва инвесторларининг Ўзбекистондаги фаолиятига кўрсатилаётган катта кўмак учун алоҳида миннатдорчилик билдирилди.
Учрашувда икки томонлама ҳамкорликнинг ривожланиш суръати ва пандемия оқибатларини енгиб ўтиш борасида кўрилаётган чоралар алоҳида таъкидланган.
Хусусан, йил бошидан турли даражалардаги алмашинув ва мулоқотлар фаоллашгани, ўзаро савдо ҳажми ва қўшма инвестиция лойиҳалари сони ортиб бораётганлиги қайд этилган.
Давлат раҳбари матбуот хизматининг қайд этишича, томонлар Тошкент шаҳрида ўтадиган Стратегик ҳамкорлик кенгаши иккинчи йиғилишининг кун тартибини ҳар томонлама тайёрлаш муҳим эканини таъкидлашган. Булар, энг аввало, товар айирбошлаш ҳажми ва кооперация кўламини ошириш, Преференциал савдо тўғрисидаги битимни қабул қилиш, қўшма саноат зонасини ташкил этиш, Туркиянинг илғор тажрибаси, билим ва технологияларини фаол жалб қилган ҳолда рақамлаштириш, таълим ва иқтисодиётнинг бошқа тармоқларидаги дастурларни илгари суриш масалаларидир.
Минтақавий шериклик ва халқаро ташкилотлар доирасидаги ҳамкорликнинг долзарб жиҳатлари юзасидан ҳам фикр алмашилди.
«Онадўли» ахборот агентлигининг маълум қилишича, Фуат Октай ташриф доирасида икки мамлакат ўртасидаги алоқаларни янада ривожлантиришга қаратилган тижорат, саноат, энергетика, қишлоқ хўжалиги, ўрмон ва туризм соҳаларига алоқадор 40 дан зиёд тадбирларни ўз ичига олган баённомани имзолаш маросимида иштирок этади.
Фуат Октай Тошкентда бўлиб ўтган Ўзбекистон-Туркия ишбилармонлик форумида сўзга чиқиб, глобал пандемия инқирозига қарамасдан, Ўзбекистон билан савдо ҳажми 2021 йилнинг дастлабки беш ойида ўтган йилнинг шу даврига нисбатан 93 фоизга ортгани ва 1,5 млрд долларга етганини таъкидлади.
«Мақсадимиз бу суръатни йил охирига қадар давом эттириб, 2023 йилга мўлжалланган мақсадларда эртароқ эришиш ва 5 млрд долларлик мўлжални ортда қолдиришдан иборатдир», — деди Фуат Октай.
