Сирдарёдаги мактаб ҳожатхонасида 8 ёшли қизга нисбатан ахлоқсиз ҳаракатларни амалга оширган эркакка 10 йил қамоқ жазоси тайинланди. Бу ҳақда «Сукут сақлама» лойиҳаси асосчиси Ирина Матвиенко маълум қилди.
2020 йилнинг октябрида Сирдарё вилоятининг Сайхунобод туманида истиқомат қилувчи аёл ўзининг 8 ёшли қизига номаълум эркак томонидан ахлоқсиз ҳаракатлар амалга оширилгани юзасидан шикоят қилган эди.
Ўшанда қизчанинг онаси 15 июль куни 8 ёшли қизи уйи олдидаги дўконга чиққанда уни номаълум эркак велосипедда 35-сонли мактабга олиб кетганини айтган эди. Қизчанинг айтишича, эркак уни мактаб ҳожатхонасига олиб кириб, ечинтирган ва ахлоқсиз ҳаракатларни амалга оширган. Уларни пайқаб қолган мактаб қоровулига эса, эркак қизалоқ синглиси экани ва ҳожатга чиққиси келганини айтган. Шундан сўнг, эркак қизни велосипедга ўтқазиб, кўча бошига ташлаб кетган ва бу ҳақда онасига ҳеч нима демаслигини таъкидлаган.
Аёл бу бўйича Ички ишлар органларига мурожаат қилган. Қизалоқ суратларда эркакни таниган. Экспертиза қизнинг танаси ва кийимларидан ҳеч қандай изларни топмаган эди. Унинг сўзларига кўра, гумонланувчи 28 ёшли маҳаллий фуқаро (олдин судланган, уйланмаган) бўлиб чиққан. Жиноятчини таниш вақтида у ўзига лезвия тортиб юборган.
2021 йилнинг 22 июнь куни гумонланувчи Жиноят кодекси 119-моддаси 4-қисми (жинсий эҳтиёжни зўрлик ишлатиб ғайритабиий усулда қондириш ўн тўрт ёшга тўлмаганлиги айбдорга аён бўлган шахсга нисбатан содир этилган бўлса) билан айбдор деб топилиб, 10 йил-у 1 ойга озодликдан маҳрум қилинди.
Шунингдек, у ўта хавфли рецидивист деб эълон қилинган.
