Грузия ҳукумати ўтган йилнинг ноябридан бери коронавирус пандемияси сабабли мамлакатда амалда бўлган комендантлик соатини бекор қилишга ва кўчада тиббий ниқоб тақиш режимини бекор қилишга қарор қилди, дея мамлакат бош вазири Иракли Гарибашвилининг сўзларини келтирмоқда РИА Новости.
«Энди тиббий ниқобларни очиқ ҳавода тақиш мажбурий бўлмайди — фақат транспорт ва ёпиқ жойларда ниқобда бўлиш зарур. Шунингдек, 1 июлдан бошлаб тунги ҳаракатни чеклаш бекор қилинади», — деди Грузия бош вазири.
Айни пайтда Грузияда рўйхатга олинган COVID-19 касаллари сони 359 минг кишини ташкил қилмоқда, кунлик ўсиш 260 нафар беморни ташкил этади. Эмланганлар сони (аҳоли сони 3 млн 982 минг киши) — 229 минг 906 киши, улардан бутунлай эмланганлар 79 минг 222 нафар фуқароларни ташкил қилади.
Коронавирус пандемияси сабабли Туркияда жорий қилинган комендантлик соати ҳам 1 июлдан бошлаб бутунлай бекор қилинади, деди республика президенти Режеп Таййип Эрдоған.
«Бугун Вазирлар Маҳкамасининг йиғилишида биз қарор қабул қилдик: 1 июлдан комендантлик соати бутунлай бекор қилинади. Давлат муассасалари одатий иш вақтига қайтади. Жамоат транспортидан фойдаланишда ёш бўйича чекловлар бекор қилинди», — деди Эрдўған.
1 июндан бошлаб Туркия ҳукумати коронавирусга қарши чораларни юмшатди — комендантлик соати қисқартирилди (22.00−05.00) ва фақат якшанба куни 24 соатлик карантин жорий этилди. Кафе ва ресторанлар харидорларни қабул қила бошлади, спорт заллари қайта очилди, тўйларга рухсат берилди.
Ҳозирда Туркияда умумий касалланишлар сони 5,38 млн киши, кунлик ўсиш ўртача 5500 кишини ташкил этмоқда.
