Президент матбуот котиби Шерзод Асадов 21 июнь куни ўтказилган брифингдан сўнг, журналистлар томонидан 24 октябрда бўлиб ўтиши кутилаётган президент сайлови масаласидаги саволга ҳам жавоб берди.
Amerika Ovozi журналисти Навбаҳор Имамова Ўзбекистонда сайлов жараёни қачон бошланиши, Шавкат Мирзиёев президентликка яна ўз номзодини қўядими ва у президент сайлови борасида ўз қарорини қачон эълон қилади, дея савол билан мурожаат қилди.
Давлат раҳбарининг расмий вакили эса сайловга тайёргарлик жараёни аллақачон бошланганини айтди. Шунингдек, Ўзбекистон ЕХҲТнинг Демократик институтларининг инсон ҳуқуқлари бўйича бюроси миссиясини бир неча бор қабул қилгани, сайловни жаҳон стандартлари, хусусан ЕҲҲТ стардартлари бўйича олиб боришга тайёргарлик кўрилаётганини қайд этди.
«Демак, сайловолди жараёнини старт берилишига унча кўп вақт ҳам қолмади, бу — июль охири ва номзодлар ким, қачон ўз номзодини илгари суришини [билиш учун], биз албатта мана шу муддатгача кутишимиз керак. Биринчи навбатда, бу ҳар битта номзодни, ҳар битта фуқарони ўзини конституциявий ҳуқуқи», — деди у.
Шунингдек, президент матбуот котиби, сайлов жараёнини ёритишда ОАВлар ўрни муҳимлигини таъкидлади. «ОАВларига келадиган бўлсак, уларни албатта ўринлари ушбу сайловолди жараёнини ёритишда жуда муҳим бўлади ва биз энг аввало ҳамма ОАВларни, Ўзбекистонда аккредитация ўтган чет эллик ОАВлардан ҳам битта нарсани объективлик, ҳолисоналикни кутиб қоламиз», — деди президент матбуот котиби.
Шу билан бирга, барча чет эллик журналистлар учун албатта стандартларга ва талабларга мувофиқ умумэътироф этилган аккредитация тартиблари ишлаб чиқилишини қайд этди. «Мана шу аккредитациядан ўтган барча чет эллик ОАВлари Ўзбекистонда сайлов олди жараёнини бемалол ёритиши мумкин», — дея якунлади Асадов.
Июнь ойи бошида «Миллий тикланиш» партияси етакчиси Алишер Қодиров партия президентликка ўз номзодини июнь ойида эълон қилишни режалаштираётганини маълум қилди. «Миллий тикланиш» вакили «Газета.uz»га партиянинг номзоди эълон қилинадиган қурултой 24 июндан кейин ўтказилиши кутилаётганини тасдиқлади.
Сайлов кодексига биноан сиёсий партия сайлов кампанияси эълон қилинадиган кунгача тўрт ойдан кечиктирмаган муддатда ўз номзодини кўрсатиши мумкин (бунда партия Адлия вазирлигида рўйхатдан ўтган бўлиши керак). Сайлов кампаниясининг ўзи Марказий сайлов комиссияси томонидан президент ваколатлари тугашидан камида уч ой олдин ОАВда эълон қилинади.
