19 июнь куни Миллий олимпия қўмитасида ЎФАнинг навбатдан ташқари конгресси бўлиб ўтди. Бу ҳақда «Газета.uz» мухбири хабар бермоқда.
Унда ЎФА раҳбари Абдусалом Азизов сўзга чиқди.
«Биз футболда кўп нарсани йўқотдик. Айримлар буни бизнес қилиб юборди. Болалар футболидан бошланди. Талантлар эмас, кимнидир илтимоси билан болалар олинмоқда. Ижодий ёндашув йўқ. Футболимизнинг энг катта камчилиги бошқа давлат мураббийлари бизнинг жамоани бир деганда ўрганиб олмоқда», — деди Азизов.
Шунингдек, ЎФА раҳбари бошқа футбол клубларининг маошларини ҳам очиқлаши ҳақида айтиб ўтди.
«Футболда холислик ва ҳаллоликни талаб қиламиз. Мана, кеча „Пахтакор“ клуби маошларини очиқладик, бошқа клубларнинг ҳам маошларини очиқлаймиз», — деди Абдусалом Азизов.
Аввалроқ, Ўзбекистон терма жамоаси мураббийи Вадим Абрамов истеъфога чиқарилгани ҳамда терма жамоа сардори Одил Аҳмедов терма жамоадаги фаолиятини якунлагани ҳақида хабар берган эдик.
