Сирдарёда террорчилик ва экстремистик ташкилотларни тарғиб қилганликда гумонланаётган 20 киши қўлга олинди, дея хабар бермоқда вилоят ИИБ ахборот хизмати.
Маълум қилинишича, 16 июнь куни интернет ижтимоий тармоқлари орқали экстремистик ва террорчилик ташкилотлар аъзоларининг таъсирига тушиб, радикал ғояларни тарғиб қилиш билан шуғулланиб келганликда гумонланаётган яширин гуруҳ қўлга олинган.
Уларнинг фаолиятига Сирдарё вилояти ИИБ ва ДХХ Сирдарё вилояти бошқармаси томонидан ҳамкорликда ўтказилган тезкор тадбирлар натижасида чек қўйилган.
Қайд этилишича, гуруҳ аъзолари Интернетнинг Telegram мессенжерида виртуал канал ташкил қилиб, у орқали экстремистик ва террорчилик ташкилотларини тарғиб қилувчи аудио ва видеоматериалларни тарқатиб келганлар.
Фото: Сирдарё вилояти ИИБ ахборот хизмати
Мазкур жиноий гуруҳнинг Мирзаобод тумани ва Янгиер шаҳарларида яшовчи 20 нафар аъзоси қўлга олинган. Мазкур шахсларнинг яшаш манзилларидан экстремистик мазмундаги материаллар процессуал тартибда расмийлаштирилиб олинган.
Ҳозирда Жиноят кодексининг тегишли моддалари билан қўзғатилган жиноят иши доирасида тергов ҳаракатлари олиб борилмоқда.
