Қримда кучли ёмғирлар натижасида 300 дан ортиқ хусусий уй хўжаликлари сув остида қолди

17 июнь кечаси Қрим шарқида кучли ёмғирлар бошланди, бир неча соат ичида баъзи ҳудудларда ёғингарчиликнинг деярли икки ойлик нормаси тушди, бу эса тошқинга олиб келди. Керчь ва унга туташ Ленинский ва Кировский туманлари энг кўп зарар кўрган. Кўплаб кўчаларда фақат қайиқларда ҳаракат қилиш мумкин, дея хабар бермоқда Meduza. Тахминан 40 минг киши электр таъминотисиз, 20 мингга яқин одам сувсиз қолган. 300 дан ортиқ хусусий уй хўжаликлари сув остида қолган. Яриморолда ҳудудий фавқулодда вазият режими жорий этилди. Ҳокимият уйлари бузилган ярим орол аҳолисига етказилган зарар мутахассислар томонидан баҳолангандан сўнг қопланади, деб ваъда берган. Минтақадаги об-ҳаво 18 июнь куни яхшиланиши кутилмоқда. — Meduza.

Японияда 20 июндан бошлаб фавқулодда ҳолат режими бекор қилинади

Япониянинг Токио ва бошқа бир қатор аҳолиси зич бўлган ҳудудларда COVID-19 пандемияси сабабли жорий этилган фавқулодда ҳолат режими 20 июндан бошлаб бекор қилинади. «Май ойининг ўрталаридан бошлаб мамлакатда юқтиришлар сони камайиб бормоқда, касалхоналардаги ётоқлар билан боғлиқ вазият яхшиланди. Бошқа томондан, айрим ҳудудларда инфекциялар сонининг пасайиши секинлашмоқда», — деди мамлакат бош вазири Ёсихидэ Суга. Шу билан бирга, у фавқулодда ҳолат ўрнига, Токиода ва мамлакатнинг баъзи бошқа ҳудудларида бир қатор чеклов чоралари кучга киришини эълон қилди. Ушбу чекловлар спиртли ичимликлар савдоси ҳамда бар ва ресторанларнинг ишлаш вақтига тааллуқлидир. Улар 11 июлгача амал қилади. Фавқулодда ҳолат фақат Окинава префектурасида қолади. — Интерфакс.

Шунингдек, Японияда эмлаш паспортларини июль ойининг ўрталаридан беришни бошлаш режалаштирилмоқда. Ҳужжатда япон ва инглиз тилларида эгасининг исми, туғилган йили, паспорт рақами, эмлаш санаси ва вакцина ишлаб чиқарувчиси кўрсатилади. Эмлаш паспортлари бепул берилади.

"Газета.uz"да реклама

Коломбо яқинидаги кема кимёвий моддалар билан чўкиб кетди

Шри-Ланканинг Коломбо шаҳри яқинида деярли икки ҳафта давомида ёниб турган контейнер кемаси кимёвий моддалар билан чўкиб кетди. Мутахассислар экологик офат оқибатларидан ҳавотирда. Ҳозирда кема 21 метр чуқурликда. Шри-Ланка Денгиз атроф-муҳитни муҳофаза қилиш идораси раҳбарининг айтишича, ёмғирлар мавсуми туфайли чўкиб кетган кемани олиб чиқиш ҳозирда хавфли, буни фақат сентябрда амалга оширса бўлади. — Associated Press.

20 май куни X-Press Pearl контейнер кемаси Коломбо шаҳридан 18 километр шимоли-ғарбда бўла туриб, портга кириш учун рухсат кутиб турганида, ёнғин бошланди. Ёнғин хавфли юк туфайли содир бўлган деб айтилмоқда. Кемада 1485 та контейнерда 25 тонна азотли кислота ва бошқа кимёвий моддалар бўлган.

Берлинда ташландиқ уйни кўчириш пайтида бир неча ўнлаб полициячилар жароҳатланди

Фото: dpa/picture-alliance/ТАСС

Фото: EPA/Vostock-photo

Берлинда чап қанот радикаллари эгаллаб олган сквотни (ташландиқ уйни) кўчиришга уриниш пайтида камида 60 нафар полициячи жароҳатланди. «Бизнинг бўлинмаларимиз ва Берлин ёнғинга қарши хизматига (бинонинг ичига — таҳр.) киришга рухсат берилмаяпти. Уларга (полицияга) ҳужум қилишмоқда, шу жумладан томдан туриб тош отишмоқда», — дейилади Берлин полицияси хабарида. Олдинроқ шаҳар коммунал хизматлари Ригерштрассе 94 жойлашган бинода ёнғин текширувини ўтказишга рухсат олишган эди. Aммо полиция бинони ўраб олишни бошлаганда, уларга тошлар отилиши бошланди. Кейин эса бинони эгаллаб олганлар кўчадаги ахлатга ўт қўйишни бошладилар. — Интерфакс.

AҚШ сенаторлари Ироқда уруш олиб боришга рухсат берувчи қоннуни бекор қилишни режалаштирмоқда

Сенатдаги демократлар раҳбари Чак Шумер 16 июнь куни сенаторларга Ироқда ҳарбий куч ишлатишга рухсат берувчи ҳужжатни бекор қилиш тўғрисидаги қонун лойиҳасини тақдим этиш ниятида эканлигини маълум қилди. Бундай қарорни қўллаб-қувватловчи сенаторларнинг фикрига кўра, бу президентнинг ҳарбий ваколатларини чеклаш учун зарурдир. Шумернинг таъкидлашича, 2002 йилда берилган рухсат 2021 йилда талаб қилинмайди, чунки Ироқдаги уруш деярли 10 йил олдин тугаган. Мисол тариқасида, сенатор 2020 йилда эронлик генерал Қосем Солейманига қарши ракета ҳужумларини бошлаш буйруғини келтирди. Ўшанда AҚШ президенти Дональд Трамп 2002 йилдаги рухсатнома асосида қарор қабул қилган эди. Оқ уй ҳам ушбу қарорнинг ҳозирги АҚШ ҳарбий операцияларига таъсир қилмаслигини таъкидлаб, қонун лойиҳасини қўллаб-қувватлади.

Шунингдек, айрим қонунчилар 2001 йилда қабул қилинган терроризмга қарши кураш тўғрисидаги қарорни қайта кўриб чиқиш ва Ироқда 1991 йилдан бошлаб куч ишлатиш учун амалда бўлган рухсатномани бекор қилиш керак, деб ҳисоблайдилар. — Associated Press.

АҚШ қўшинларини Ироқдан олиб чиқиш тўғрисида қарор 2011 йилда қабул қилинган ва ўша йилнинг декабрь ойида барча қўшинлар олиб чиқилган.

Швецияда бош вазирга ишончсизлик вотумини билдириш режалаштирилмоқда

Швециянинг Демократлар партияси (ДП) парламентда бош вазир Стефан Лёвен ва унинг ҳукуматига ишончсизлик билдириш бўйича овоз беришни талаб қилди. «Ҳозирда Риксдагда (парламент) кўпчилик бош вазирни лавозимидан четлаштириш ниятида», — деди ДП етакчиси Хенрик Винге. «Маълум бўлиши билан биз ҳаракат қила бошладик. Бизда ёмон ҳукуматни четлаштириш учун етарли имконият бор ва биз бу имкониятдан фойдаланишимиз керак», дея қўшимча қилди у. ДП таклифи христиан-демократлар ва мўътадил коалиция партияси томонидан ҳам қўллаб-қувватланди. — ТАСС.

Украинада 30−40 йил ичида чўлга айланиш таҳдиди мавжуд

Иқлим ўзгариши туфайли Украина ўта юқори ҳаво ҳарорати ва иқлим ҳалокатлари зонасига ўтмоқда, бу эса мамлакатни чўлга айланиши билан таҳдид қилмоқда. Бу ҳақда мамлакат Aтроф-муҳит ва табиий ресурслар вазирлиги маълум қилди. «Яқин 30−40 йил ичида мамлакатнинг йирик ҳудудлари чўлланиш хавфи таҳдид қилмоқда», дейилади хабарда. Вазирлик маълумотларига кўра, Украина экин майдонлари бўйича дунёда тўққизинчи ўринни эгаллайди, — деярли 33 млн гектар экин майдонлари. Бундан ташқари, мамлакатдаги экин майдонларининг 60 фоизидан ортиғи чернозем билан қопланган. Таъкидланишича, 13 млн гектар қишлоқ хўжалиги ерлари сув эрозиясига, 6 млн гектардан зиёд ер мунтазам равишда шамол эрозиясига учрамоқда, 20 млн гектаргача ерлар чанг бўрони билан қопланмоқда.

Украина Ички ишлар вазирлиги раҳбарининг маслаҳатчиси Михаил Aпостол аввалроқ сўнгги 30 йил ичида қурғоқчилик туфайли мамлакатда 10 минг дарё йўқолганини айтган эди. Унинг сўзларига кўра, Украина яқин 20−30 йил ичида ичимлик сувини импорт қилишга мажбур бўлади. — ТАСС.

Шунингдек:

  • АҚШ ва Россия президентлари Женевада юзма-юз кўришиб, киберхавфсизлик, инсон ҳуқуқлари, минтақавий можаролар ва бошқа мавзуларни муҳокама қилди. Жо Байден суҳбат оҳангини «яхши ва ижобий» деб атаган бўлса, Владимир Путин «саммитда ҳеч қандай душманлик бўлмаганини» таъкидлади.
  • Янги Зеландия 2020 йилги президентлик сайловлари натижаларини сохталаштириш ва инсон ҳуқуқларини бузишда гумон қилинаётган бир қатор Беларус фуқароларига ўз ҳудудига киришни тақиқлади.
  • Туркия президентининг сўзларига кўра, Озарбайжонда турк ҳарбий базаси очилиши мумкин.
  • Хитой бортида уч фазогир бўлган «Шэньчжоу-12» космик кемасини қурилаётган Хитой космик станциясига учирди.
  • Австрияда 1 июлдан бошлаб комендантлик соати бекор қилинади.