Самарқанд вилояти Иштихон тумани ҳокимлиги ахборот хизмати ходими шу туманга борган журналистларнинг камерасига ташланиб, ундаги хотира картасини чайнаб, йўқ қилгани ҳақида айтилмоқда.
14 июнь куни «My5» телеканалининг ходимлари Иштихон деҳқон бозоридаги озиқ-овқат расталарида содир бўлган ёнғин тафсилотини ёритиш учун воқеа жойига борган.
Журналистлар бу ерда туман ҳокимлиги ахборот хизмати ходими Илҳом Бобоевнинг қаршилигига учраганини айтмоқда. Тарқалган видеолардан кўриш мумкинки, воқеаларни суратга олиш жараёнида ахборот хизмати ходими камера хотира картасини суғуриб олгани ҳам тушиб қолган.
Фото: Kun.uz
«My5» телеканали мухбирининг Kun.uz`га маълум қилишича, ижодий гуруҳ ёнғин содир бўлган ҳудудга борганида, маҳсулотлари ёниб кул бўлган тадбиркорлар билан суҳбатлашаётган туман ҳокимини учратган ва ҳолат бўйича қисқача изоҳ ҳам олган.
«Бироқ ҳокимлик ахборот хизмати айнан ёнғин жойидан тасвирлар олишимизга қаршилик кўрсатиб, муаммо ҳал бўлганини айта бошлади. „Биз ҳеч қандай муаммони эмас, бўлган воқеани ёритмоқчимиз“, дейишимизга қарамасдан қаршилик кўрсатишда давом этди. Кейин эса тўсатдан камерамиздан хотира картасини олиб қўйди. Шерикларим унинг картани оғзига солиб, чайнаб юборганини айтмоқда. Ахборот хизмати ходими картани чайнаб йўқ қилдими, ютиб юбордими, нима қилди, аниқ билмайман. Аммо унда жуда муҳим ишларимиз бор эди. Тезда вазиятга ИИБ ходимлари аралашиб, Илҳом Бобоевнинг бизга қаршилигини тўхтатди, аммо барибир хотира картасиз қолдик», — деган мухбир.
Иштихон туман ҳокимлиги ахборот хизмати раҳбари мазкур ҳолат бўйича изоҳ ҳам берган.
«Бозордаги ҳолатни ўрганиш учун кечаси соат 01:00да боргандик. Тушга яқин энди одамларни тинчлантирай деганимизда ҳаммаси қайтадан бошланди. Фуқаролардан интервью олишлари жараёнида яна одам йиғилиб кетди. Одамлар жазавада эканини бир неча бор тушунтирдим, одамлар, аёллар яна уришиб кетишди. Хуллас, тушунмовчилик бўлди», — деган у.
Самарқанд вилояти ҳокимлиги мазкур ҳолат назоратга олинганини маълум қилган.
«Иштихон туманида ҳокимлик матбуот хизмати ва журналист билан боғлиқ ҳолат вилоят ҳокимлиги ахборот хизмати ҳамда АОКА ҳудудий бошқармаси томонидан иккала томон иштирокида тўлиқ ўрганиб чиқилиши белгиланди», — дейилган хабарда.
