Саудия Арабистони Ҳукумати жаҳонда кузатилаётган мураккаб эпидемиологик вазият ҳамда ҳожиларнинг соғлиғини ҳимоя қилишни таъминлаш мақсадида «Чет эл фуқаролари учун Ҳаж зиёратини чеклаш, маҳаллий аҳоли ва мамлакатда доимий яшовчи резидентлар учун Ҳаж тадбирини ўтказиш тўғрисида"ги қарорни қабул қилди.
Мазкур ҳужжатда 2021 йилги Ҳаж ибодатини бажарадиган маҳаллий зиёратчиларнинг чекланган миқдордаги умумий сони 60 минг нафар этиб белгилангани, хорижий мамлакатлардан зиёратчилар қабул қилинмаслиги қайд этилган.
Бу ҳақда Ўзбекистоннинг Жидда шаҳридаги Бош консулхонаси Ҳаж ва умра масалалари бўйича Атташесининг расмий маълумотига таяниб, Вазирлар Маҳкамаси ҳузуридаги Дин ишлари бўйича қўмитаси хабар бермоқда.
Расмий хатда ҳожиларнинг хавфсизлиги ва саломатлигини таъминлаш мақсадида, жорий йилги ҳаж тадбири — Саудия Арабистони подшоҳлиги аҳолиси ва ушбу мамлакатда муқим яшаб келаётган 18 дан 65 ёшгача бўлган, энг асосийси, COVID-19`га қарши эмланган фуқаролар (резидентлар) учун ташкил этилиши кўрсатиб ўтилган.
Саудия ҳукуматининг ушбу қарори Жаҳон соғлиқни сақлаш ташкилоти, Саудия уламолари Кенгаши, Ислом ҳамкорлик ташкилоти, ислом мамлакатларидаги кўплаб фатво ҳайъатлари ва бошқа илмий марказлар томонидан маъқулланган.
Маълумот ўрнида, ҳозирда Саудия Арабистонида ҳар куни ўртача 1000 дан ортиқ вирус билан касалланиш, 15−20 та ўлим ҳолатлари кузатилмоқда.
«Юқоридагиларга асосланган ҳолда, Ўзбекистон Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, „Ҳаж“ ва „Умра“ тадбирларини ташкил этиш ва ўтказиш масалалари бўйича Жамоатчилик кенгаши Саудия Арабистони ҳукуматининг ҳожилар манфаатлари, уларнинг ҳаёти ва соғлиғини ҳимоя қилишни таъминлаш нуқтаи-назаридан қабул қилган ушбу қарорини қўллаб-қувватлайди», — дейилади хабарда.
Жамоатчилик кенгаши шунингдек, ҳаж сафарига боришни режалаштирган фуқароларнинг навбатлари кейинги мавсум учун сақланиб қолишини эслатиб ўтган.
Бу йилги Ҳаж ибодатларини адо этиш муддати 17−22 июль кунларига тўғри келмоқда.
Эслатиб ўтамиз, пандемия сабаб Саудия Арабистони 2020 йилдаги ҳаж зиёратини ҳам хорижлик зиёратчилар учун бекор қилган эди.
