«Толибон» ҳаракати Туркиядан НАТОга аъзо бошқа мамлакатлар қаторида ўз қўшинларини Афғонистондан олиб чиқиб кетишни талаб қилди. Бу ҳақда ҳаракат вакили Соҳайл Шаҳиннинг сўзларига таяниб, «ТАСС» хабар берди.
«Биз АҚШ билан 2020 йилнинг 29 февралида имзолаган келишувга мувофиқ, Туркия НАТО аъзоси сифатида Афғонистондан ўз қўшинларини олиб чиқиб кетиши лозим. Туркия мусулмон давлат, Афғонистон у билан тарихий алоқаларга эга. Келажакда мамлакатимизда янги Исломий ҳукумат ташкил этилгандан сўнг Туркия билан яқин ва яхши муносабатда бўлишга умид қиламиз», — дея Шаҳиннинг сўзларидан иқтибос келтирмоқда TOLO News.
«Толибон» НАТО аскарлари Афғонистонни тарк этиши ортидан Туркиянинг Кобул аэропортини ўз қуролли кучлари билан муҳофаза қилиш тўғрисидаги таклифига шу тарзда муносабат билдирди.
Reuters маълумотига кўра, НАТОга аъзо мамлакатлар мудофаа вазирларининг май ойида бўлиб ўтган учрашувида АҚШ ва унинг иттифоқчилари Афғонистондан қўшинларни олиб чиқиш режасини муҳокама қилган вақтда, Анқара Вашингтонга ушбу таклифини билдирган. Туркиянинг мазкур таклифига оид мунозараларни келаси ҳафта бўлиб ўтадиган НАТО саммити чоғида давом эттириш режа қилинган.
Маълумот ўрнида, 14 апрель куни АҚШ президенти Жо Байден Афғонистондан Америка қўшинларини олиб чиқиб кетиш бошлангани, ушбу жараён жорий йил 11 сентябрга қадар якунланишини эълон қилганди.
Дональд Трапм бошчилигидаги аввалги маъмурияти 2020 йилнинг февралида Доҳада «Толибон» ҳаракати билан имзолаган тинчлик битимига кўра, Вашингтон 2021 йилнинг 1 майига қадар ўзи ва иттифоқдошларининг қўшинларини мамлакатдан олиб чиқиши керак эди. Эришилган келишувлардан бу тарзда четлашиш толиблар томонидан кескин норозиликка сабаб бўлди, бу ҳолатда улар ўзларини Доҳа шартномаси бўйича қабул қилинган мажбуриятлардан қарийб, озод деб ҳисоблашини билдирган.
Май ойида АҚШ Афғонистондан олиб чиқилаётган қўшин ва ҳарбий техникани Марказий Осиё, жумладан Ўзбекистон ва Тожикистонга жойлаштириш имкониятларини кўриб чиқаётгани ҳақида хабар қилинган эди.
