Куни кеча Наманган вилоятида истиқомат қилувчи 16 ёшли йигит Тошкент шаҳрининг Олмазор туманидан оқиб ўтувчи Дамаши каналида чўкиб кетди, деб хабар бермоқда Zamon дастури.

ФВВ матбуот котиби Самандар Ҳикматуллаевнинг сўзларига кўра, йигит қўлларини канал сувида ювмоқчи бўлганида, бехосдан тушиб кетган. Гувоҳлар зудлик билан воқеа тўғрисида қутқариш хизматига хабар беришган.

«Тошкентда сувда чўкиш ҳолатлари кўпинча бошқа вилоятлардан келган — талабалар ёки шу ерда ишлаш учун келган фуқаролар билан содир бўлади. Бунинг сабабларидан бири ҳудуднинг табиий географиясини ёки сув чуқурлигини билмасликдир», — деди ФВВ матбуот хизмати раҳбари.

Шунингдек, Бўзсу каналида чўкиб кетган яна бир фуқаро ҳақида хабар берилди. Дастлабки маълумотларга кўра, эркак чўкаётган қизни кўрганида, ўзини сувга ташлаган. Қиз қутқариб қолинган, бироқ эркакнинг ўзи сувдан чиқа олмагани айтилмоқда.

Ҳолатлар бўйича, Фавқулодда вазиятлар вазирлиги, Ички ишлар вазирлиги ва Миллий гвардия ходимлари қидирув-қутқарув ишларини давом эттирмоқдалар.