Самарқанд Европа тикланиш ва тараққиёт банкининг қиймати 3 миллиард еврони ташкил қилувчи «Яшил шаҳарлар» флагман дастурига қўшилиш орқали барқарор ривожланишни режалаштиришни такомиллаштирадиган биринчи шаҳар бўлди, дея хабар беради ЕТТБ «Газета.uz»га.
Ушбу қадам Ўзбекистоннинг 2050 йилгача углерод нейтраллигини таъминлашга ҳисса қўшиши кутилмоқда.
Самарқанд дастурнинг 48-иштирокчисига айлангани душанба куни ЕТТБ биринчи вице-президенти Юрген Ригтеринк ташрифи чоғида имзоланган ўзаро англашув меморандуми билан тасдиқланди. У 7−9 июнь кунлари ЕТТБнинг Ўзбекистондаги катта делегациясига раҳбарлик қилади.
Барқарор ривожланиш дастурига қўшилган шаҳарлар ЕТТБнинг молиявий кўмагида синов лойиҳаларини амалга оширади. Жумладан, Самарқанд учун электр автобусларининг сотиб олинишига инвестиция ажратиш ҳамда атроф-муҳит ҳолатини яхшилаш, шаҳарни «яшиллаштириш» бўйича ҳаракатлар режаси ишлаб чиқилиши кутилмоқда.
Ҳисоботда айтилишича, глобал миқёсда атмосферага чиқадиган газларнинг тўртдан уч қисми шаҳарларга тўғри келади. 2016 йилда бошланган ЕТТБнинг «Яшил шаҳарлар» дастури кам углеродли келажак сари ҳаракат қилишга қаратилган чоралар ёрдамида иштирокчи шаҳарларнинг экологик эҳтиёжларини қаноатлантиришга ёрдамлашади.
