Олий Мажлис Қонунчилик палатаси спикери ўринбосари, «Миллий тикланиш» демократик партияси раҳбари Алишер Қодиров «Alter Ego» лойиҳасига берган интервьюсида, нима учун сўнгги пайтларда унинг муносабат ва изоҳлари кўпгина муҳокамаларга сабаб бўлаётгани ҳамда «одамларнинг ғазаби»ни келтираётгани ҳақида гапириб ўтди.

«Бу ғазабни мен адолатли деб билмайман. Лекин, тан оламан, бу менинг ҳам хатоим. Охиригача тушунтириб бера олмайман. Менинг бир қанча баёнотларимда айтилган гаплар мутлақо бошқача талқин қилинади. Бутунлай», — деди депутат.

Алишер Қодировнинг фикрига кўра, ҳозирги жамият хабарларни юзаки ўқийди, шунинг учун нотўғри тушунишлар юзага келади.

«Жамиятимиз, маълумот истеъмолчиси, юзаки ўқишади — биринчи, иккинчи, учинчи сатр ўқилади, бўлди тамом. Менинг хатойим нимада биласизми, мен ҳозир ўзимни ақлли қилиб кўрсатмоқчи эмасман, лекин мен кўп ёзаман ва узоқ тушунтираман. Менинг тушунтиришларимни ҳамкасбларим ҳам танқид қилишади, бошлаганимда мен тез тушунтиришим керак, қисқа ва лўнда қилиб. Мана шуни қила олмаяпман. Шундан келиб чиқиб, мен қилган бир қанча муносабатлар нотўғри талқин қилинди ва охиригача тушунилмади. Муаммо шунда. Мен бу хатойимни тан оламан, бунинг устида ишламоқдаман», — дея таъкидлади у.

«Миллий тикланиш» партияси раҳбари кўпгина мавзуларни тушунтиришда рус сегменти билан келиша олмаганини таъкидлади. Унинг сўзларига кўра, ўзбек сегменти билан мулоқот қилиб вазиятни тушунтириш мумкин, лекин русийзабон одамлар билан бу ўхшамаяпти.

«Мен тўғри тушунтиришга бўлган бир қанча уринишларим, ўз натижасини бермади. Ўзбек сегментида ўхшайди, бориб одамлар билан кўришасиз, тушунтирасиз. Одамлар дарров ўзгаришади, айниқса ижтимоий тармоқларда мен ўша ерни ўзида тушунтиришларга ўтаман. Шунда ҳозиргина сизни урушаётган одамга: „Сиз мени нотўғри тушундингиз, келинг мен сизга тушунтираман десангиз“, бир-икки гаплар ва инсон дарров ўзгаради. „Мени кечиринг, мен сизни нотўғри тушундим“, дейди. Ўзбек сегментида бу ўхшайди. Лекин, ҳайратланарлиси шуки, рус сегменти шунчалик қатъий, шунчалик… билмадим мен ҳозир сўз топа олмасам керак. Жуда қўпол ҳам деса бўлади. Адолатли эмас дейиш ҳам мумкин эмас, чунки бу менинг хатоларим. Мен рус сегментидан бундай қўполликни кутмаган эдим, мен аксинча ўзбек сегментидан шундай бўлади деб кутгандим», — деди депутат.

Алишер Қодиров рус тилида сўзлашувчи аудитория билан ҳозирча келиша олмаётганини ва диалог қилиш имкони бўлмаётганини таъкидлади.

«Эҳтимол, бу менинг хатоларим, қайтараман. Мен русийзабон аудиторияга [қарашларимни] охиригача тушунтириб бера олмаяпман. Менда диалог ўхшамаяти. Мен бунинг устида ишламоқдаман. Бунинг устида биз кўпроқ ишлашимиз ва тушунтиришларга кўпроқ эътибор беришимиз керак. Вақти келиб, умид қиламанки, одамлар бизни тушунишни бошлайди», — дейди у.

Депутат рус тилида сўзлашувчи аудитория учун «оғриқли мавзулар»ни олиб чиқаётганлигига ҳам тўхталиб ўтди.

«Мавзулар жуда кучли, оғриқли. Тушунтиришларда эса инсон қисқа ва лўнда фикрини ифодалаши керак. Рус тилида менда ўхшамаслигидан кўрқаман. Мен ҳозир тан олаётган хатойим, мен барча ўйлаётган нарсаларимни рус тилида бутунлай ифодалай олмаслигимни тан оламан. Мавзулар жуда оғриқли. Бироқ уларни аниқ тушунтириш керак», — дейди депутат.