4 июнь куни Қирғизистон президенти Садир Жапаров Иссиқкўл вилояти Иссиқкўл туманига сафари вақтида унинг кортежи иштирокида йўл-транспорт ҳодисаси содир бўлди. Бу ҳақда АКИpress президент матбуот хизматига таяниб хабар бермоқда.

Йўлнинг Иссиқкўл тумани Ананьево қишлоғи яқинидаги қисмида президентга ҳамроҳ бўлган шахсларга тайинланган автомашинани қарама-қарши йўналишга чиқиб кетган машина уриб юборган.

«Президентнинг ўзи бошқа машинада бўлган ва жароҳат олмаган», — дея ёзмоқда Қирғизистоннинг Kloop нашри.

Дастлабки маълумотларга кўра, қарама-қарши йўналишга чиқиб кетган автомобиль ҳайдовчиси маст ҳолатда бўлган.

ЙТҲ натижасида уч киши жароҳат олган. Миллий хавфсизлик давлат қўмитасининг 1 нафар ходими эса вафот этган.