Тошкент ҳокимияти 31 май куни пойтахтнинг Яккасарой ва Сергели туманларини боғлайдиган йўл ўтказгич қурилишининг бориши тўғрисида маълумот берди ва лойиҳа нархининг деярли икки бараварга ошганига изоҳ берди.
«Газета.uz» Яккасарой ва Сергели туманларини боғлайдиган олти қаторли автойўл ва учта йўл ўтказгич қурилиши қиймати 280 млрд сўмдан 518,3 млдр сўмгача оширилгани ҳақида ёзган эди. Қурилиш ишлари Grand Road Tashkent томонидан олиб борилади. Ҳукумат лойиҳани тендерсиз амалга ошириш ҳамда қурилиш-монтаж ишларини лойиҳа-смета ишлари билан бир вақтда олиб боришга рухсат берган эди.
Кўприк Чўпонота кўчасидан, Шота Руставели кўчаси билан кесишган жойидан бошланиб, кичик халқа автомобиль йўли, Салар канали, сўнгра темир йўллар устидан, Тошкент халқа автомобиль йўлининг устидан ўтиб Сергели тумани Қипчоқ кўчасига олиб чиқади.
Лойиҳанинг дастлабки кўриниши. «Газета.uz» у ҳақда батафсил маълумот берган эди.
Бош лойиҳалаштирувчи сифатида танланган Allegro Develop Plast компанияси техник директори Тошкент ҳокимияти матбуот хизматига берган интервьюсида лойиҳанинг бирламчи нархи «жойнинг коинотдан олинган тасвирлари, узунлиги, кенглиги ва дастлабки кўринишидан келиб чиқиб» шакллантирилганини маълум қилди.
«Биз буни тахминан ҳисоб-китоб қилиб чиқдик. Ушбу нарх асосида биз қурилиш ишларини бошладик. Бироқ тегишли қарорлар асосида, йўлларни тезкор ва сифатли қуриш учун бизда объектни лойиҳалаштириш учун Туркиянинг Kalyon Ulastirma [компаниясини] жалб қилиш фикри туғилди… Kalyon келганидан кейин трассани синчковлик билан ўрганиш, яъни топографик тасвирга олиш, геологик ўрганишлар, диагностика ишларини ўтказишимизга тўғри келди, Kalyon Ulastirma бошқа жозибадор, сифатли ва қулай таклифни илгари сурди», — деди у.
Янги лойиҳа.
Унинг сўзларига кўра, лойиҳа қўшимча тарзда ишлаб чиқилди — бошида унда кўприкдан кичик халқа йўлига тушиш йўллари фақат Чўпонота кўчаси тарафидан бўлган ва бу ҳайдовчилар учун ноқулайликлар туғдирарди. Лойиҳага қўшимча тушиш йўллари қўшилди.
Бундан ташқари, кўприк 100 фоиз монолит қоплама технологияси бўйича қурилмоқда. Аввал кўприклар тўсинлар (балка) билан ўпиб чиқилар эди. Монолит қопламанинг қалинлиги 1 м бўлиб, арматуралари пўлат арқонлар билан боғлаб чиқилади ва бу конструкциянинг мустаҳкамлиги ва чидамлилигини оширади.
Темир йўл устидан ўтган қисм халқаро стандартларга мувофиқ 5.5 метр баландликда қурилаётган эди, лекин темирйўлчилар кўприкни яна икки метрга кўтаришни талаб қилдилар, ўз-ўзида кўприкнинг қия қисми ҳам узайди, дея қайд этди матбуот хизмати.
«Кўприкни ўтказишда муҳандислик коммуникацияларини ўзгартириш бўйича катта ишлар амалга оширилди: юқори кучланишли электр тармоғи ер остига олинди, Салар оқими ўзгартирилди, ҳозирда бир қисми йўл ҳудудига тушган магистрал газ қувури кўчирилмоқда, халқа йўли яқинида тозалаш иншоотлари бўлган эди, уларни демонтаж қилишга тўғри келди. Шунингдек, лойиҳада қурилиш бўладиган барча манзилларда бузиш ишлари бўлмаслигига алоҳида эътибор қаратилди. Бу каби кенг кўламли ишларнинг барчаси иншоот қийматига киритилди», — дейилади хабарда.
Пойтахт маъмурияти, шунингдек, бошқа ҳаражатлар ҳам бўлди: масалан, йил давомида қурилиш материалларининг (арматура ва бетон) нархи икки баробар ошганини таъкидлади.
«Айтиб ўтилган фактлар қурилишнинг бирламчи қиймати нима учун 236 млрд сўмга ошганини тушунтиради. Шу билан бирга, лойиҳанинг муҳим жиҳати шундаки, йўл ўтказгич ва унга кириш қисмлари қурилиши давомида бирорта ҳам бино бузилгани йўқ», — дея маълум қилди ҳокимият матбуот хизмати.
Ҳокимлик томонидан эълон қилинган ҳисоб-китобларга кўра, Чўпонота йўл ўтказгичи қурилишининг бошланғич қиймати 133,5 млрд сўмни ташкил этган бўлса, энди у 52,9 млрд сўмга ўсди ва 186,4 млрд сўмни ташкил этди, ТАҲЙ 2-сонли йўл ўтказгич — 30,4 млрддан 89,4 млрд сўмгача (+59 млрд), Қипчоқ йўл ўтказгичи — 2 млрддан 20,6 млрд сўмгача (+18,6 млрд) ўсди. Йўл қурилишининг қиймати 115,7 млрд сўмдан 172 млрд сўмгача (+56,3 млрд) ошди.
Кўприкнинг умумий узунлиги 6,6 км ни ташкил этади.
Натижада лойиҳанинг умумий қиймати, шу жумладан қурилиш зонасидан 51,8 млрд сўмлик коммуникацияларни олиб ташлаш харажатлари, 236 млрд сўмга ошди ва 281,7 млрддан 518,3 млрд сўмга етди.
Йўл ўтказгичнинг Чўпонота кўчасидан Халқа йўлигача бўлган биринчи қисми сентябрда, Қипчоқ кўчасигача бўлган иккинчи қисми йилнинг охиригача ишга тушади. Янги йўл ўтказгич шаҳар марказигача бўлган йўлни қисқартиришга ва Ўзгариш кўчасидаги доимий тирбандликларни камайтиришга имкон беради.
