Ўзбекистон ва Россия «Спутник V» вакцинасини республика ҳудудида ҳамкорликда ишлаб чиқаришга келишиб олди. РИА Новости нашри Тошкентга ишчи ташриф билан келган РФ Соғлиқни сақлаш вазири Михаил Мурашкога таяниб ёзишича, Ўзбекистон томони дори воситаси ишлаб чиқариладиган майдонни ҳам танлаб бўлган.
Жума куни президент Шавкат Мирзиёев Михаил Мурашкони қабул қилди ва соғлиқни сақлаш соҳасидаги лойиҳаларни амалга ошириш, шу жумладан, телемедицинани йўлга қўйиш масалаларини муҳокама қилди.
«РФ президенти Владимир Путин ва Ўзбекистон президенти топшириқларига асосан «Спутник V»ни (Ўзбекистонда — таҳр.) ишлаб чиқаришни маҳаллийлаштиришга келишиб олдик», — дея Мурашконинг сўзларини келтирмоқда РИА Новости.
«Ўзбекистон 24»га берган интервьюсида россиялик вазир турли йўналишлар, хусусан, тез ёрдам ва педиатрия бўйича лойиҳаларни биргаликда амалга ошириш ҳақида сўзлаб берган.
«Бизнинг мутахассисларимиз пандемия даврида Ўзбекистон ҳудудида ишлашди. Шунингдек, Тошкентда Пирогов номидаги Москва тиббиёт университетининг филиалини очиш режалаштириляпти. Қолаверса, „Спутник V“ вакцинасини Ўзбекистон ҳудудида ишлаб чиқариш лойиҳасини амалга оширишга тайёргарлик кўрилмоқда», — деди у.
Михаил Мурашко президент Шавкат Мирзиёевни «ноёб инсон» деб атади. «У биз тез ҳаракат қилаётганимизни кўриб турган бўлсада, „бу етарли эмас“, деяпти. Биз буни мутлақо қўллаб-қувватлаймиз», — деди вазир.
Россия Соғлиқни сақлаш вазирлиги раҳбари қўшимча қилишича, Ўзбекистон томони Россия вакцинаси учун ишлаб чиқариш майдончасини танлаб олган, ҳозирда лойиҳа ишлаб чиқилмоқда.
Ўзбекистон 23 апрель куни «Спутник V» вакцинасининг илк партиясини қабул қилиб олди, иккинчиси эса — 27 апрелда келтирилди.
Бош вазир Абдулла Арипов россиялик ҳамкасби Михаил Мишустин билан Казандаги учрашувида Москвадан «Спутник V» вакцинасини етказиб бериш ҳажмини ошириш ҳамда уни республикада ишлаб чиқариш масаласини кўриб чиқишни сўраганди.
2020 йилнинг декабрида Ўзбекистон фармацевтика тармоғини ривожлантириш агентлиги Россиянинг коронавирусга қарши вакцинасини Tashkent Pharma Park ҳудудида ишлаб чиқаришни таклиф қилган эди.
