Ўзбекистон Осиё тараққиёт банки ҳамда Осиё инфратузилмавий инвестициялар банкидан жами 200 млн доллар қарз олади.
Бу президентнинг «Осиё тараққиёт банки ва Осиё инфратузилмавий инвестициялар банки иштирокида «Ўзбекистон Республикасида коронавирус COVID-19 инфекциясига қарши шошилинч чораларни кўриш» лойиҳасини амалга ошириш чора-тадбирлари тўғрисида"ги қарорида ўз аксини топган.
Ҳужжат билан жалб этилаётган қарзлар:
- Осиё тараққиёт банкидан 100 млн доллар — 10 йиллик имтиёзли давр билан 40 йилда қайтариш шарти асосида;
- Осиё инфратузилмавий инвестициялар банкидан 100 млн доллар — 10 йиллик имтиёзли давр билан 30 йилда қайтариш шарти асосида.
ОТБдан ажратилган маблағнинг 35 млн доллари — 1000 та тез тиббий ёрдам махсус автотранспорт воситаларини харид қилишга йўналтирилади.
Бундан ташқари, лойиҳанинг мақсадли кўрсаткичларидан қуйидигаларни амалга ошириш ўрин олган:
- 7 та халқаро стандартларга жавоб берувчи Миллий референс лабораторияларини яратиш;
- 1 та Санитария-эпидемиология ҳузуридаги Миллий референс лабораторияни ташкил этиш;
- 475 та муассасани реконструкция қилиш, капитал таъмирлаш ва жиҳозлаш;
- ССВ тизимидаги камида 80 фоиз тиббиёт ходимларини COVID-19`га қарши текшириш учун тест синовларини ўтказиш;
- 9 та республика ўлат профилактикаси маркази филиаллари ва бўлинмаларини ташкил этиш.
Телеграмдан фойдаланасизми? Муҳим янгиликларни ўтказиб юбормаслик учун каналимизга аъзо бўлинг.
ОТБ ва ОИИБ кредитлари бўйича қарзни тўлаш билан боғлиқ ҳаражатлар, шунингдек, комиссион ва бошқа ҳаражатлар бўйича тўловлар Республика бюджетидан қопланади.
