ЮНЕСКО Умумжаҳон мероси қўмитасининг 44-сессиясида Шаҳрисабзнинг тарихий қисмини регенерация қилиш лойиҳаси кўтарилади. Бу ҳақда маданият вазири ўринбосари, Маданий мерос департаменти бошлиғи Камола Aкилова «Газета.uz» мухбири билан суҳбатда маълум қилди.
Таъкидланишича, франциялик экспертлар Маданий мерос департаменти билан биргаликда Шаҳрисабз бўйича таклифлар тайёрлашган. Экспертлар ҳозирда концепциянинг 3 хил версиясини ишлаб чиққани, бироқ, ҳозирча улар ҳақида бирор маълумот ошкор қилинмаётгани айтилди.
«[ЮНЕСКО Умумжаҳон мероси қўмитасининг] 44-сессияда бу, албатта, муҳокама қилинади. Муҳим жиҳати, бизга ҳозир ҳеч ким 2 йил ичида регенерация қилинглар деб айтгани йўқ. Бу ерда лойиҳа ҳақида гап кетмоқда. Биласизми, улар 2 йил ичида батафсил ўрганиб, мана шу концепцияларни ишлаб чиқди. Уларни 3 хил таклифлари бор. Бу 44-сессиясида 3 хил концепциядан биттаси танланади. Йилнинг охиригача концепцияни ҳар бир деталигача алоҳида ишланади, кейинги йилдан эса амалий ишлар бошланади», — дея таъкидлади Камола Акилова.
Вазир ўринбосарининг қўшимча қилишича, хорижлик эксперлар Ўзбекистон томонидан таклиф қилинган.
«Ушбу лойиҳадан Ўзбекистон манфаатдор. Буни юқори тажрибали мутахассисларни жалб қилинишидан ҳам билса бўлади. Улар ростдан ҳам яхши мутахассис, бутун жаҳон бўйича тарихий объектлар билан шуғулланишган, тажрибаси катта. Ҳозир амалий иш бошлашдан аввал лойиҳани концептуал жиҳатдан ўрганиб, бир тўхтамга келишимиз керак. Шундан кейин Ўзбекистон амалий регенерацияга маблағ ажратади», — деди у.
У, шунингдек, ўзбекистонлик мутахассислар тарихий объектларни қайта тиклаш ишларини қандай олиб боришига ҳам тўхталган.
«Бизда, аввал бузишади, кейин нима қилишни ўйлашади. Ёки мана реставрация қилишади-да кейин тўғри қилдим-ми, йўқми деб ўйлашади ёки умуман ўйлашмайди. Ўшанинг учун, бу [хорижлик] мутахассисларда илмий жиҳатдан ёндашиш жуда кучли, шунинг учун натижаси ҳам яхши. Кейин улар шошилмайди», — дея тушунтирди маданият вазири ўринбосари.
ЮНЕСКО Умумжаҳон мероси қўмитасининг 44-сессияси 2020 йилнинг 29 июнидан 9 июлига қадар Хитойнинг Фуцзянь провинцияси Фучжоу шаҳрида ўтказилиши режа қилинган эди. Бироқ, коронавирус пандемияси сабаб мазкур сессия қолдирилганди. Ушбу сессия июль ойининг биринчи қисмида бўлиб ўтиши кутилаётгани маълум қилинди.
