UzReport TV телеканали Unitel (Beeline савдо белгиси) компанияси муаллифлик ҳуқуқини бузганликда айблаб, судга мурожаат қилди.

Телеканалнинг даъво аризасида таъкидланишича, Beeline шартнома тузмасдан, UzReport TV ва Futbol TV эфирларини ўзига тегишли бўлган Beeline TV мобил дастурида қайта трансляция қилиш билан шуғулланмоқда.

«Шу тариқа мобил оператори телеканалнинг қонуний ҳуқуқларини бузиб, моддий манфаат кўриб келмоқда», — дейилади хабарда.

UzReport TV қайд этишига кўра, бир неча бор огоҳлантирилишига қарамасдан, Unitel МЧЖ компанияси юқорида кўрсатилган хатти-ҳаракатларини бартараф этиш юзасидан чора кўрмади.

Телеканал ўз даъво аризасида «Beeline TV» мобил иловасида UzReport TV ва Futbol TV телеканалларини шартнома тузмасдан намойиш этмасликни сўраган.

UzReport TV (Futbol TV) — Европанинг бир қатор мамлакатлари миллий чемпионатлари, Чемпионлар Лигаси, Европа Лигаси, Европа ва Жаҳон чемпионатлари ҳамда бошқа кўпгина футбол ўйинларини трансляция қилишнинг эксклюзив муаллифлик ҳуқуқи эгаси ҳисобланади.

Beeline муносабати

«Газета.uz» сўровига биноан, Beeline Uzbekistan компанияси муаллифлик ҳуқуқини бузганликдаги айблов билан рози эмаслигини ва амалдаги қонунчилик доирасида ўз позициясини ҳимоя қилишга тайёрлигини билдирди.

«Телевизион тарқатиш тармоғи хизматларини кўрсатиш учун Ахборот технологиялари ва коммуникацияларини ривожлантириш вазирлиги билан тузилган лицензия келишуви, тузилган шартномага мувофиқ, „Ўзбекистон кабель телевидениеси“ МЧЖ Unitel МЧЖга Beeline TV платформасида телеканалларни ретрансляциясини амалга ошириш учун „Ягона сигнални етказиб бериш“ бўйича хизматларни тақдим этади», — дейилади хабарда.

Beeline таъкидлашига кўра, «Ўзбекистон кабель телевидениеси» бу Ўзбекистондаги Ягона сигнал — Ахборот фаолияти ва маълумотлар узатишни такомиллаштириш ва самарадорлигини ошириш бўйича идоралараро мувофиқлаштириш комиссияси томонидан тасдиқланган ОАВ телевидение маҳсулотларидан ташкил топган телевидение каналларининг (дастурларининг) белгиланган тўпламини тарқатувчиси ҳисобланади.

" «Ўзбекистон Кабель Телевиденияси» МЧЖ томонидан тақдим этилган доимий телеканаллар тўпламига «Uzreport TV» и «Futbol TV» ҳам киради. Тузилган шартномага биноан, «Unitel» МЧЖ телевизион каналларнинг «Ўзбекистон Кабель Телевиденияси» МЧЖ томонидан тақдим этилган белгиланган пакетини мустақил равишда ўзгартира олмайди", — дейилади компания хабарида.

Beeline агар керак бўлса, компания судда ўз далилларини тақдим этишини маълум қилди.