23 май куни Беларусда мухолифатчи Nexta Тelegram каналининг собиқ бош муҳаррири Роман Протасевич қўлга олинди. Бу ҳақда Nexta канали хабар бермоқда.
Роман Протасевич Афинадан Вильнюсга учаётган Ryanair компаниясининг самолётида бўлган. Ryanair самолёти бортида бомба ўрнатилганлиги ҳақидаги сигналдан кейин Минск аэропортида қўнишни амалга оширган.
«Пул Первого» Telegram каналининг ёзишича, Беларусь президенти Александр Лукашенкога вазият ҳақида маълум қилинган, у эса «самолёт ортга қайтарилсин ва қабул қилиб олинсин» дея буйруқ берган. Қайд этилишича, Лукашенконинг фармони билан «йўловчи самолётига ҳамроҳлик қилиш учун» осмонга МиГ-29 қирувчи самолёти кўтарилган.
Nexta маълумотларига кўра, Протасевич парвоздан олдин уни кимдир кузатаётганини сезган.
Литва президенти Гитанас Науседа Беларусь ҳукуматидан Nexta Telegram каналининг собиқ бош муҳаррири Роман Протасевични зудлик билан озод этишни талаб қилди.
«Мен НАТО бўйича иттифоқдошларга ва Евроиттифоққа мурожаат қилиб, уларни Беларусь режими халқаро фуқаролик авиацияси учун солаётган хавфга тезликда чора кўришга чақираман», — деди Науседа.
2020 йил ноябрида Nexta асосчилари Роман Протасевич ва Степан Путило (иккаласи ҳам ўша вақтда Европада яшарди) Беларусь КГБси томонидан террорчилик фаолиятига алоқадор жисмоний шахслар рўйхатига киритилган эди. Nexta Telegram каналининг ўзи ва унинг логотипи айни пайтда Беларусь ҳудудида экстремистик материаллар деб тан олинган.
