20 май куни кечқурун Тошкентнинг Содиқ Азимов кўчасида кучли шамол туфайли дарахт Malibu автомашинасини босиб қолди. Воқеа жойидан олинган фотосурат ва видеолар TashkentLand Телеграм-канали томонидан эълон қилинди.
Маълум қилинишича, воқеа натижасида автомобилни бошқараётган қиз жароҳат олган. Кейинчалик каналда пойтахтнинг турли жойларидан табиат ҳодисаси оқибатлари акс этган бошқа лавҳалар пайдо бўлди. Хусусан, видео болаларнинг батутини олиб кетаётгани ва яқин атрофда бўлган одамлар болаларни хавфсиз жойга олиб боришга уринаётгани видеоси эълон қилинди.
Видеодан лавҳалар / TashkentLand
Бундан ташқари, Toshkentliklar Телеграм-каналида ер усти метро станцияларидан бирининг томи вайрон бўлгани акс этган видео жойлаштирилди. Лавҳадан томнинг қайси қисмлари йўлга учиб кетаётгани ва ободонлаштириш хизмати ходимлари уларни йўл четига олиб чиқишаётганини кўриш мумкин.
Айни пайтда жабрланганларнинг аниқ сони ва етказилган зарар ҳақида маълумот берилгани йўқ. Соғлиқни сақлаш вазирлиги, Фавқулодда вазиятлар вазирлиги, Тошкент шаҳар ҳокимлиги ва бошқа идоралар ҳали ҳеч қандай изоҳ беришмади.
