Тошкент вилояти Қибрай туманидаги қулупнай даласида ишлаган деҳқонларга 20 май куни йўқ қилинган ҳосил учун товон пуллари тўлаб берилди, дея хабар қилди туман ҳокимияти матбуот хизмати «Газета.uz»га.

Аввалроқ «Чинкелди» маҳалласида бульдозер ёрдамида 8 га майдонда ҳосили пишиб турган қулупнай даласи бузилгани ҳақида хабар берган эдик. Туман маъмурияти ушбу дала жойлашган ер участкаси «Янги Ўзбекистон» боғи, «Истиқлол» мажмуаси ва бошқа объектларни қуриш доирасида давлат эҳтиёжлари учун олиб қўйилганини маълум қилди.

Шунингдек, ҳокимият матбуот хизмати ер эгалари ва ижарачилари олдиндан огоҳлантирилгани, улар билан тегишли товон пулини тўлаш бўйича келишув имзоланганини таъкидлаган эди.

Кейинроқ Қибрай тумани ҳокимияти қишлоқ хўжалиги масалалари бўлими бошлиғи ўринбосари Ҳамидулла Тўрахўжаев Kun.uz нашрига фермер ва деҳқонлар ушбу келишувга рози бўлганини таъкидлади.

«Фермер хўжалигида 20,2 гектар ер майдони мавжуд. Шу ер майдонидан 12 гектар боғи бор, ўша боғнинг оралиғига 8 гектар қулупнай экилган. Давлат эҳтиёжига олишда фермер билан келишилган эди. Деҳқонлар ҳам бўшатиб беришга рози бўлишди. Ўшанда терилмаган қулупнай учун бир гектарига 50 млн сўм, ярмидан ўтган, яъни терилган майдонлар учун гектарига камида 24 млн сўм товон пули тўлашга келишилди», — деди у.

Мутахассис ушбу участкаларда тўққиз нафар деҳқон қулупнай етиштирганини таъкидлади.

«Биз далолатномалар тузилиб, қийматни чиқариш учун экспертизага берилгани, нархлаш ишлари якунланиб тасдиқлангач, ҳужжатлар молия бўлимига тақдим этилиши ҳамда товон пуллари тўланишини айтганимизда тўғри тушунишганди. Орадан 4−5 кун ўтгач, ишончсизлик пайдо бўлдими, тўламаяпсизлар, деган маънода шундай йўл тутишмоқда», — деди Ҳамидулла Тўрахўжаев.

Унинг сўзларига кўра, 20,2 гектар майдонидаги боғ ва экинлар учун жами 850 млн сўм товон пули тўлаш назарда тутилмоқда. Якуний рақам экспертиза хулосасидан сўнг аниқ бўлади. Қулупнай майдони учун ажратилган 192 млн сўм ҳам шу сумманинг ичида.

Унинг қўшимча қилишича, аслида яқинда тарқалган видеоёзувда картошка бузилаётгани акс этган, боғ ораларига экилган қулупнай майдонлари олдинроқ бузилган бўлган.

«Газета.uz»нинг Қибрай ҳокимиятидан аниқлик киритишича, деҳқонлар қолган қулупнай ҳосили учун гектарига 20 млн сўмдан олишга рози бўлишган. Улардан қулупнай экини учун қилинган харажатлари қоплангани, бу экин учун эътирозлари йўқлиги ҳақида тилхатлар олинган.

Қайд этилишича, айрим деҳқонлар фақат қулупнай эккан бўлса, баъзилари седана, фасол ва картошка уруғи ҳам қадаган. Фермер хўжалиги ер майдонларида экилган бошқа экинлар учун товон пуллари баҳолаш экспертизаси ўтказилгач, яна тўланади.