Президент Шавкат Мирзиёев 14 май куни Республика ихтисослаштирилган гематология илмий-амалий тиббиёт марказига ташриф буюрди. Давлат раҳбари марказдаги шароитлар билан танишиб, бу ерда даволанаётган болалар ва уларнинг ота-оналари билан суҳбатлашди. Мазкур суҳбатлардан бири Асакалик Розия Бозорбоева билан бўлди.
Розиянинг онаси айтган сўзларига кўра, ноябрь ойида Андижон вилоятининг Асака туманидан Тошкентга даволаниш учун келишган. «Кимё-терапияни олдик, жарроҳлик амалиётини ўтказдик, ҳозирги пайтда нур терапиясини олмоқдамиз. Келган вақтдагига қараганда анча яхшимиз, натижалар ҳам яхши. Бу ерда ҳамма шарт-шароит яхши. Уч маҳал иссиқ овқат бериляпти. Ҳаммажой тоза-озода, болалар учун ҳамма шарт-шароитлар яратилган. Одамлар чет элга бориб даволаняпти, лекин бизда ҳам ҳамма шароитлар бор», — дейди у. Розиянинг онасининг сўзи билан айтганда «президент келишини эшитган Розиянинг носоғлом ҳужайралари соғайиб кетди».
Президент Розияга соғайиб кетишини айтиб, Андижонга борганида президентга хат ёзишини таъкидлади. Розиянинг онаси қизи у ердаги шифокорларни кўриб Андижон тиббиёт институтига киришни ният қилганини президентга билдирди. «Андижон тиббиёт институтига кирди! Менинг ҳисобимдан бугун кирди. Президент ҳисобидан ўзим „норма“ бераман, кириб, яхши ўқиб, бундан ҳам зўр шифокор бўласиз», — деди Шавкат Мирзиёев Розиянинг онасининг гапларини эшитгандан сўнг.
Фото: «Ўзбекистон 24»
«Мен ўқишга киролмайман, деб ўйлагандим. Кўп вақтим касалхонада ўтиб кетаётганди. Лекин президентимиз келиб тузаласан, талаба бўласан деб айтди. Жуда ҳам хурсанд бўлдим», — дейди Розия Бозорбоева.
«Қизим Андижон тиббиёт институтига қабул қилинди кеча. Президент шу ваъдани берганларидан сўнг дарров Андижон вилояти ҳокими телефон қилди. Андижон тиббиёт институти ректорлари телефон қилишди», — дейди Розиянинг онаси кўзёшлари билан.
Фото: «Ўзбекистон 24»
Розиянинг сўзларига кўра, унинг президент келганига, ўқишга кирганига ҳали ҳам ишонгиси келмайди. «Ҳудди тушда яшаётгандекман. Ҳаммаси шунчалик тез бўлдики, ўзимнинг ишонгим келмаяпти. Энди мен фақат яхши бўлиш учун курашаман», — дейди Розия.
«Бугун сиз учун қандай кун?», деган саволга Розиянинг онаси «Бугун президентимизни кўрган кун. Телевизорда кўрар эдик. Ҳаётда бошқача одам эканлар. Самимий, оддий… Тасвирлаб бера олмайман… Бизнинг бошимизга соябон келди», — деб жавоб берди.
