БАА компанияси Masdar (Abu Dhabi Future Energy Company) Сурхондарё вилоятининг Шеробод туманида 200 МВт.лик қувватга эга қуёш фотоэлектр станциясини қуриш бўйича лойиҳа тендерида энг жозибадор тарифни таклиф этди. Бу ҳақда Ўзбекистон Энергетика вазирлиги матбуот хизмати хабар берди.

Лойиҳани амалга оширишга 54 та халқаро компания қизиқиш билдирган. Биринчи босқичдан 5 та компания ўта олган, иккинчисидан эса — 4 та.

  • Masdar 1 кВт.соатга — 1,8045 цент таклиф қилди,
  • ACWA Power — 2,4825 цент,
  • HK / China Power Holding International — 2,1621 цент,
  • Total Eren эса — 3,3940 цент.

Нархлар ҚҚСни ҳисобга олмаган ҳолда кўрсатилган.

Молиявий таклифлар зарур мезонлар талабларига риоя қилиши бўйича баҳоланганидан сўнг, лойиҳани амалга оширадиган инвестор номи эълон қилинади, деб қайд этишди Энергетика вазирлигида.

Лойиҳа доирасида инвестор-ишлаб чиқарувчи янги 220 кВ.лик подстанцияни қуриши ва 500 кВ.лик Сурхон подстанциясига уланиш учун 52 км узунликдаги электр ўтказувчи линияни бунёд этиши лозим бўлади.

Masdar портфелида аллақачон Ўзбекистондаги бир қанча лойиҳалар мавжуд. Шу жумладан, компания Навоий вилоятидаги 100 МВт бўлган фотоэлектр станция қурилиши, Зарафшондаги 500 МВт.лик шамол электр станцияси, Тошкент вилоятидаги 40 кВт.лик кичик қуёш электр станцияси ва бошқа лойиҳалар қурилиши билан шуғулланмоқда.