9 май куни Тошкентдаги Ғалаба боғида Хотира ва қадрлаш кунига бағишлаб ўтказилган тантанали маросимда президент Шавкат Мирзиёев уруш фахрийлари билан самимий мулоқот қилган эди. Ўшанда уруш ва меҳнат фронти фахрийларини моддий таъминлаш тизимини янада яхшилаш бўйича алоҳида ҳужжат қабул қилиш зарурлигини таъкидлаган эди.
Шундан келиб чиқиб, 11 май куни президент «Иккинчи жаҳон уруши қатнашчиларининг моддий таъминотини янада кучайтириш чора-тадбирлари тўғрисида"ги фармонга имзо чекди.
Ҳужжатга мувофиқ, Иккинчи жаҳон уруши қатнашчилари, шунингдек, вояга етмаган даврида фашистлар концлагерларида асирликда бўлган ва Ленинград шаҳрида қамал шароитида меҳнат қилган шахсларнинг энг кам пенсия миқдори шу йил 10 майдан бошлаб — 2,5 миллион сўм этиб белгиланмоқда.
Маълумот ўрнида, ҳозирги кунга қадар Иккинчи жаҳон уруши қатнашчиларининг энг кам пенсия миқдори 800 минг сўмни, ўртача ҳисобда эса 1,7 млн сўмни ташкил этган.
