«Лотин ёзувига асосланган ўзбек алифбосини жорий этиш тўғрисида"ги Қонунга ўзгартиришлар киритиш ҳақида"ги Қонун лойиҳасининг муҳокамасини 2021 йил 1 ноябрга қадар давом эттиришга қарор қилинди. Бу хақда Давлат тилини ривожлантириш департаменти хабар бермоқда.
Хабарга кўра, ушбу вақт давомида масъуллар томонидан қонун лойиҳасининг зарурати ва аҳамиятига бағишланган илмий анжуманлар, маъруза ва семинарлар ўтказилади. Алифбога шаклий ўзгаришлар киритилиши муносабати билан талаб этиладиган харажатлар миқдори ўрганилади. Бундан ташқари,ОАВда такомиллашаётган алифбонинг турли (фонетик, график, техник, имло) хусусиятларига доир туркум кўрсатув ва мақолалар ташкил этилиши кўзда тутилган.
Илмий анжуманларда билдирилган таклиф ва мулоҳазалар турли соҳа олим ва зиёлиларидан иборат экспертлар гуруҳи иштирокида ўтказиладиган конференцияда кўриб чиқилиб, якуний хулосага келинади ҳамда лойиҳа билан биргаликда Ҳукуматга киритилади, таъкидланди баёнотда.
Эслатиб ўтамиз, март ойида «Лотин ёзувига асосланган ўзбек алифбосини жорий этиш тўғрисида"ги Қонунга ўзгартиришлар киритиш ҳақида"ги қонун лойиҳаси жамоатчилик муҳокамаси учун эълон қилинган эди.
Ўзбекистонда лотин ёзувига асосланган, суратдаги каби 28 ҳарф ва 1 та ҳарфлар бирикмасидан иборат ўзбек алифбоси жорий этиш кўзда тутилган.
Ҳарфларни қуйидагича ўзгартириш таклиф қилинмоқда:
«Ғ, ғ» — «Ḡ, ḡ»
«Ў, ў» — «Ō, ō»
«Ш, ш» — «Ş, ş»
«Ч, ч» — «Ç ç»
Маълумотларга кўра, 15 кунлик муҳокама давомида «regulation.gov.uz» да лойиҳани 26 мингдан зиёд киши кўриб, 1035 та фикр қолдирган. Таклифларнинг 56 фоизи (547 таси) лотин ёзувига асосланган ўзбек алифбосини ислоҳ қилинишини, 32 фоизи (302 таси) эса амалдаги алифбода қолишни ёқлаган.
Шунингдек, кўпчилик C («тс») ҳарфини алифбога киритиш ва нг ҳарфини алифбодан чиқариб, имло қоидалари доирасида ўрганишни таклиф этган.
Ижтимоий тармоқларда алифбо ислоҳотини қўллаб-қувватлаш билан бирга, ислоҳотнинг молиявий юки, ўрта авлоднинг саводсиз бўлиб қолишидан ташвишланиб билдирилган фикрлар ҳам бор, дейилади департамент хабарида.
