Бир инсон маълум бир вакцинанинг биринчи дозасини олганидан сўнг, иккинчи дозада бошқа вакцинани олиши мумкин эмас. Бу ҳақда Санитария-эпедимиологик осойишталик ва жамоат саломатлиги хизмати бошлиғининг ўринбосари Ботир Қурбонов маълум қилди.
«Ҳар бир вакцина ўзига хос усул ва ўзига хос тажрибадан келиб чиққан ҳолда яратилади. Ўзига хос таркибга эга. Ҳеч қачон битта вакцина билан бошлангандан кейин, иккинчи вакцина билан давом эттирилмайди. Яъни, „Спутник V“ вакцинасини олган одам AstraZeneca ёки ZF-UZ-VAC2001 вакцинасини олиши мумкин эмас», — деди у.
Баъзи бир вакциналар ўлдирилган ёки нофаол вакцина, баъзилари рекомбинат ёки ярим тайёрланган вакцина эканлиги қайд этиб ўтилди.
«Баъзи вакциналар тўлиқ ДНК, РНК синтез усулида яратилган вакциналар ҳисобланади. Яъни уларнинг яратилиши ҳам, вакциналарнинг таркиби ҳам бир биридан тубдан фарқ қилганлиги боис, вакциналарнинг ишлатилишида, вакцина қилинган одамнинг организмида антитаначалар ишлаб чиқарилиши ҳам ўзига хос кетади. Битта вакцинага нисбатан ишлаб чиқарилган антитаначалар иккинчи вакцина қилинганда „срыв“ ёки бўлмаса организмда иммун-жавоб реакциясини ўзига хос кечиши ва у одам касалликка чалиниб қолиш мумкинлиги, мана шу вакцинага қарши қандайдир салбий оқибатга олиб келиши мумкинлиги кўзда тутилган», — дея таъкидлади Ботир Қурбонов.
Жаҳон тажрибасида битта вакцина олингандан сўнг, иккинчи дозани албатта ўша вакцина билан қилиниши бугунги кунда долзарблигича сақланиб қолинган, қўшимча қилди СЭС бошлиғининг ўринбосари.
