SpaceX илк бор Starship ракета прототипини муваффақиятли тарзда қўндира олди. Синов парвози компаниянинг YouTube-каналида тўғридан-тўғри намойиш этилди. Бу компаниянинг бешинчи синов парвози эди.
Бундан аввал Марс ва Ойга учишга мўлжалланган ушбу турдаги ракета прототипи тўрт маротаба портлаган эди. Аввалги учта уринишда космик кема қўниш пайтида портлаган бўлса, тўртинчи уринишда қўниш жараёнидан сўнг портлаган.
Эфир тугагандан сўнг SpaceX асосчиси Илон Маск ракета прототипининг муваффақиятли қўнишига муносабат билдирди: «Starship қўнди!» дея ёзди у ўз Twitter’ида.
Starship — космик кема ва ўта оғир ракетадан иборат комплекс бўлиб, у Ой ва Марсга бўлажак сафарларда 100 га яқин одам ва 91 тонна юк ташиш учун мўлжалланган.
