Олий Мажлис Қонунчилик палатаси депутати, ЎзЛиДеП фракцияси аъзоси Расул Кушербаев «Миллий тикланиш» партиясининг ижтимоий-сиёсий газетасининг «Жаноб Либераллар, сукут аломати ризоми?» номли мақоласига муносабат билдирди.

Расул Кушербаев охирги вақтлар «Миллий тикланиш» партиясининг чиқишларига эътибор қилмасликка уринаётганини таъкидлади. «Улар негадир муаммоларни сунъий яратиш, одамларни уриштириш, низо чиқариш, оддий айтганда, фитна қўзғашга ўхшаш ҳаракатлар қилаётганга ўхшайди», — дейди депутат.

«Балки адашгандирман, бироқ бу сўнгги пайтлардаги шахсий кузатувларим. Шу боис ҳар бир иши, чиқишига эътибор қилаверсам, мен ҳам айирмачига айланиб қоламан. Мен эса ўзбек, қирғиз, тожик, рус, корейс, татар, қозоқ, уйғур ва бошқа дўстларим, қадрдонларим билан „Сен ариқнинг у томонида экансан“, деб уришишни истамайман», — деди у.

«Бироқ ушбу партия нашрининг 5 май 15-сонида жимжимадор қилиб ишланган коллаж остида босилган „Жаноб Либераллар, сукут аломати ризоми?“ сарлавҳали мақолада негадир яна сунъий равишда тадбиркорларга мен, Дониёр Ғаниев ва биз аъзо бўлган партияни ёмон кўрсатишга уринишибди. Бунақа „бозорбоп“ чиқиш учун энг муносиб жавоб аслида эътибор бермаслик эди. Лекин андишанинг оти ҳам қўрқоқмас, индамасак бўлмаслигини тушундик. „Миллий тикланиш“ партияси газетаси баҳонасида уларга бир нарсани эслатиб ўтмоқчиман: ЎзЛиДеП фракциясидаги ҳар бир депутат алоҳида индивидуал шахс ва ҳар бирининг ўз мустақил фикри бор. Фикрлар доим ҳам бир жойдан чиқмаслиги мумкин. Чунки либераллик, аввало, эркинлик ва янгиликка интилиш дегани», — дейди Расул Кушербаев.

Депутатнинг сўзларига кўра, ҳаммани бирдек, бир қолипда фикрлашга ўргатиш ва айттириш собиқ иттифоқ мафкурасига хос иш. «Бу мафкура кўпроқ «Миллий тикланиш»га ёққан кўринади. Ёқса, марҳамат, ворислик қилаверинг, бироқ бизни тинч қўйинг!», — таъкидлади у.

«Яна бир гап. Мақолада иддао қилинган мавзу, яъни кўчалардаги реклама масаласида мен ўз фикримни айтдим: ёқадими-йўқми, буниси қизиқмас. Йўллар, аввало, ҳайдовчи ва йўловчига қулай бўлишини истайман, йўл реклама майдони ёки бозор эмас. Йўл, бу ўз номи билан йўл ахир. Йўл бўйларига ҳар қандай бўлар-бўлмас реклама воситалари қўйилишига шахсан мен қаршиман. Бу гапим ёқмаса ёқмас, бироқ сунъийлик қилиб, ёқмаган гапни ёқди, деб айтолмайман-ку! Хуллас, реклама қилишга йўлдан бошқа жой топиш керак», — деб айтди Расул Кушербаев.

Қонунчилик палатаси депутати сўнгги вақтлар «Миллий тикланиш» партияси миллат тақдири, тарбия, билим деган гапларни бот-бот такрорлаётгани ҳақида тўхталиб ўтди.

«Агар ростдан ҳам шундай бўлса, нима учун куни кеча минглаб, керак бўлса, миллионлаб юртдошларимиз кўз тикиб турган «Виждон эркинлиги ва диний ташкилотлар тўғрисида"ги қонунни янги таҳрирда қабул қилиш жараёнида айнан «Миллий тикланиш» партияси вакиллари диний таълим муассасасида таълимни кенгайтириш масаласига қарши чиқди? Диний билим, шу жумладан, муқаддас Ислом дини ҳақида таълим олиш фақат диний соҳа ходимлари учун эмас, аҳоли, шу жумладан, ота-оналар учун ҳам эркин бўлиши зарурлигини таъкидлаган Дониёр Ғаниев ва мени нима учун қўллаб-қувватлашмади? Аксинча, улар буни терроризм, радикализм билан боғлади, юртдошларимизга бу масалада ишонишга эрта, деган қараш билан диний таълимда эркинлик берилишига қарши чиқди, фақат диний идора ходимлари учун диний таълим олиш мумкин, деган эскирган қолипни ёқлади», — дея таъкидлади у.

«Ушбу позициянгиздан кейин ҳам Сизларни ким деб аташимиз керак, «Миллий тикланиш"ми ёки?» — дея савол берди ЎзЛиДеП фракцияси аъзоси.

«Ўйлайманки, «Миллий тикланиш»нинг мендан бошқа ташвиши, муаммолари ҳам кўп ва яхшиси, бизни тинч қўйиб, ҳар хил фитна, ғийбатлар билан эмас, партия олдида турган жиддийроқ ишлари билан шуғулланишсин», — қўшимча қилди Расул Кушербаев.