Сурхондарё вилоятида AЁҚШдаги ёнғин натижасида пайвандчи вафот этди, дея хабар бермоқда ИИВ ҳузуридаги Тергов департаменти ахборот хизмати.
Ҳодиса 4 май куни соат 09:30 да Шўрчи тумани «Озод» маҳалласи ҳудудида жойлашган МЧЖга қарашли қурилиши тугалланмаган AЁҚШ биносида содир бўлган. Мазкур бинода пайвандлаш ишларини олиб бораётган 52 ёшли A.A. шахобча ҳовлисида жойлашган 20−25 тонналик бензин ва дизел ёқилғисини сақлаш учун мўлжалланган цистерна устига бир ўзи пайвандлаш ускунасини олиб чиққан. У пайвандлаш ишларини бошлаган вақтида цистерна ичида йиғилиб қолган газ ва ҳаво аралашмасидан чақнаш содир бўлганлиги натижасида ёнғин келиб чиққан.
Ёнғин оқибатида A.A. «бутун танасининг 90−95% термик куйиши» ташхиси билан тиббиёт бирлашмасининг жонлантириш бўлимида вафот этган.
Ҳолат юзасидан Шўрчи тумани ИИБ ҳузуридаги Тергов бўлими томонидан МЧЖ раҳбари 45 ёшли И.Н. га нисбатан Жиноят кодексининг 257-моддаси 2-қисми «а» банди (меҳнатни муҳофаза қилиш қоидаларининг бузилиши оқибатида одам ўлимига сабаб бўлиши) билан жиноят иши қўзғатилган.
Ҳозирда тергов ҳаракатлари олиб борилмоқда.
