Тошкент шаҳрида 87 ёшли аёл қизи ва невараси томонидан калтакланди, дея хабар бермоқда «Взгляд.uz» аёлнинг бошқа невараси Даврон Тиллаевга таяниб.
Ҳодиса 23 апрель куни уй-жой масаласи бўйича она ва қиз ўртасида жанжал сабаб содир бўлган. Aёл каравотда ётган пайтида қизи унинг сочидан тортиб, ерга судраб туширган ва ура бошлаган. Aёл 3 соатга яқин ерда ётган.
Даврон Тиллаевнинг айтишича, онахоннинг қизи унинг қўл ва оёғига пичоқ билан урган. Шунингдек, унинг ички кийимини оғзига тиқиб, протезини тортиб олган ва устига пешоб қуйган.
Тиллаев 25 апрель куни меҳмонга келган ва бувисининг оғир аҳволдалигини сезган. Aёлнинг қизи ва невараси тўшакдан йиқилиб тушганини айтган. Бироқ Тиллаев бунга ишонмаган, чунки унинг оёқлари ишламай, танаси ва юзи кўкарган бўлган.
Шундан сўнг у аёлни даволаниш учун хусусий клиникага жойлаштирган. Даврон Тиллаев ариза ёзганидан кейин ҳам ҳеч қандай чора кўрилмаганини айтади.
«26 апрель, душанба куни мен ариза ёздим. Бугун, сешанба куни саккизинчи кун ўтди, жавоб йўқ», — дейди у.
Даврон Тиллаевнинг айтишича, ижтимоий тармоқларда тарқалган видеодан кейин уларга суд экспертизаси келган.
«Экспертиза кеча бўлиб ўтди, энди жавоб чиқиши учун 3−4 кун керак бўлади. Бугун ҳамма суриштиришни бошлади. ИИББдан қўнғироқ қилишди, милиция бўлимига чақиришди», — дейди невара.
Ҳозирда кекса аёлнинг аҳволи яхшилангани қайд этилади.
Бундан ташқари, Тиллаев бувисининг квартираси бошқа бир невараси номига ноқонуний равишда рўйхатдан ўтганини айтди.
ИИББ ахборот хизмати хабар беришича, ҳолат юзасидан Жиноят кодексининг 110-моддаси, 2-қисми, «в» банди (ожиз аҳволдаги айбдорга аён бўлган шахсни қийнаш) билан жиноят иши қўзғатилган.
