Чоршанба куни Uzbekistan Airways томонидан сотиб олинган олтинчи Boeing 787−8 Dreamliner авиалайнери Тошкент аэропортига қўнди. Авиация анъанасига кўра, лайнер ўт ўчириш машиналари брандспойтлари орқали отилган сув мушакбозликлари билан кутиб олинди.
UK78706 рақами билан рўйхатга олинган самолёт Boeing корпорациясининг йиғиш заводи жойлашган АҚШнинг Вашингтон штатидаги Эверетт шаҳридан тўғридан-тўғри парвозни амалга оширди. Лайнер Uzbekistan Airways экипажи томонидан бошқарилди ва парвоз 12 соат 9 дақиқа давом этди.
Самолёт 2019 йил декабрда йиғилган бўлиб, 2020 йилда етказиб берилиши кутилаётган эди, аммо коронавирус пандемияси сабабли у 2021 йилга қолдирилди, деди Uzbekistan Airways вакили. Салон сиғими — 270 йўловчига мўлжалланган бўлиб, шу жумладан бизнес-класс 24 та ўриндан иборат.
Самолёт командири Руслан Алмамедовнинг журналистларга маълум қилишича, экипаж АҚШга бир ҳафта олдин синов парвозларини амалга ошириш ва лайнернинг барча механизмларини текшириш учун етиб борган. Кейин Ўзбекистоннинг АҚШдаги элчиси Жавлон Вахабов иштирокида самолёт қабул қилиб олинган.
«Бу оддий парвоз эмас эди, — таъкидлади АҚШнинг Ўзбекистондаги вақтинчалик вакили Алан Мельцер. — Самолёт орқали Қорақалпоғистон аҳолисига коронавирус пандемияси билан курашишда ёрдам бериш учун мўлжалланган қиймати 3 млн долларлик тиббий асбоб-ускуналар етказиб берилди. Бундан ташқари, Boeing худди шу мақсадда 100 минг доллар маблағларини хайрия қилди».
Uzbekistan Airways авиакомпаниясининг матбуот хизматининг таъкидлашича, бу Boeing компанияси билан биргаликда ташкил этилган учинчи гуманитар рейс ҳисобланади, дастлабки иккитаси 2016 йилда амалга оширилган. Project C.U.R.E. хайрия ташкилоти томонидан тақдим этилган жўнатмалар — касалхоналар учун ётоқлар, матраслар ва ногиронлар учун аравачаларни ўз ичига олган. Project C.U.R.E. гуманитар ёрдам юкларини етказиб бериш бўйича дунёдаги энг йирик дистрибютор.
Uzbekistan Airways 2016 йил сентябрь ойида «Дримлайнер"ларнинг тижорат эксплуатациясини бошлаб, Boeing 787'нинг Марказий Осиёдаги биринчи буюртмачисига айланган эди. Дастлабки иккита лайнер 2016 йилда, учинчиси 2018 йилда ва яна иккитаси 2019 йилда келтирилган. Шу билан Boeing компанияси ушбу турдаги самолётларни маҳаллий авиакомпанияга етказиб бериш бўйича буюртмани якунлади.
«Boeing 787 Dreamliner оиласига тегишли самолётларнинг узоқ масофага мўлжалланганлиги ҳамда ёқилғи тежаш хусусияти Uzbekistan Airways авиакомпаниясига ўз йўналишлари тармоғини мослашувчан равишда қуриш ва инқироз тугагандан сўнг келажакдаги фуқаролик авиацияси бозорининг ўсишига тайёрланиш имкониятини беради», — дейилади авиакомпания хабарида.
Бир неча кун аввал президент Uzbekistan Airways авиакомпаниясининг трансформация жараёнларини жадаллаштириш тўғрисида фармонни имзолаган эди. Ҳужжатга кўра, лизинг берувчига учта Boeing-757−200 самолётини қайтариб бериш, декабргача эса иккита Boeing-767 ва иккита Boeing-757 самолётларини сотиш режалаштирилган. Шунингдек, иккита Airbus A321neo LR (узоқ масофага мўлжаланган версияси), ҳамда, яна учта A321neo ҳаво кемасини ижарага олиш кўзда тутилган.
