Uzbekistan Airways авиакомпанияси 30 апрель куни президент фармони билан тасдиқланган «Йўл харитаси» доирасида авиакомпанияни трансформация қилиш жараёнларини тезлаштиришни режалаштирмоқда.
Октябрь ойигача лизинг берувчига учта Boeing-757−200 самолётини қайтариб бериш, декабргача эса иккита Boeing-767 ва иккита Boeing-757 самолётларини сотиш режалаштирилган. Май ойининг бошида авиакомпания олтинчи Boeing-787 самолётини қабул қилиши кутилмоқда.
Йил охирига қадар Uzbekistan Airways авиакомпанияси иккита Airbus A321neo LR (узоқ масофага мўлжаланган версияси) самолётини ижарага олмоқчи. Шунингдек, келгуси йилда яна учта A321neo ҳаво кемасини ижарага олиш кўзда тутилган. Йил охирига қадар тўртта А320 самолёти эконом тоифасига ўтказилиб, тўлиқ қайта жиҳозлаш режалаштирилган (full economy).
Бундан ташқари, Ми-8 вертолётининг сотилиши ва Uzbekistan Helicopters компанияси учун тўртта Airbus вертолётининг (иккитадан H125 ва H130) сотиб олиниши кутилмоқда.
Хорижий компаниялар билан музокаралар доирасида иккита йўловчи ташувчи Boeing-767 самолётини юк ташиш конфигурациясига қайта жиҳозлаш режалаштирилган.
Шунингдек, фармон билан 1999−2013 йилларда ишлаб чиқарилган, сотиш таклиф этилаётган 17 та самолёт ва симуляторларнинг рўйхати тасдиқланди. Рўйхатга бешта Boeing (757 ва 767), бешта Ил-76 ТД, еттита Ил-114−100, шунингдек Ил-114−100 симулятори киритилган.
Эслатма: агар 2022 йил 1 июлигача Ил-76 самолётлари реализация қилинмаса, улар рўйхатдан олиб ташланади ва белгиланган тартибда утилизация қилинади.
