Олий Мажлис Қонунчилик палатаси спикерининг ўринбосари, «Миллий тикланиш» демократик партияси раҳбари Алишер Қодиров 1 май куни Тошкентда бўлиб ўтган «Ғалаба қўшиқлари» деб номланган концертда СССР байроғи кўтарилганлигини ҳақорат ва провокация дея таъкидлади.
«Миллий тикланиш» демократик партияси куни кеча Тошкент Истиқлол саройи олдида ташкил этилган беғараз концерт дастурида йўл қўйилган ғаразли провокацияни кескин қоралайди", — деб ёзди у ўзининг Telegram-каналида.
«Биз санъатга қарши эмасмиз, санъатни сиёсатга қурол қилинишига қаршимиз. Тараққийпарвар ўзбек зиёлилари ва оқкўнгил аждодларимизнинг қонига бўялган босқинчи совет давлати байроғини мамлакатимиз пойтахтининг қоқ марказида баланд кўтарилишини ўзбек халқига нисбатан ҳақорат деб ҳисоблаймиз», — дейди депутат.
Партия Бош прокуратурани «ушбу провокацияга тегишли баҳо беришга» чақирди.
Маълумот учун, 1 май куни «Халқлар дўстлиги» санъат саройи олдидаги майдонда «Хор Турецкого» жамоаси ва Сопрано гуруҳининг «Ғалаба қўшиқлари» деб номланган концерт дастури тақдим этилди.
