Президент Шавкат Мирзиёев шу ҳафта коррупцияга қарши курашиш масалалари бўйича видеоселектор ўтказади. Бу ҳақда «Газета.uz» мухбири президент матбуот котиби Шерзод Асадовга таяниб, хабар бермоқда.
Видеоселекторда давлат органлари, ҳокимларнинг ҳисоботлари эшитилади.
Бундан ташқари, чет тилларини ўқитиш тизимини такомиллаштириш, Токио Олимпиадасига спортчиларни тайёрлаш масалалари бўйича йиғилишлар бўлиши кутилмоқда.
Қишлоқ хўжалиги техникаси корхоналарини трансформация қилиш бўйича тақдимот ўтказилиши ҳам режалаштирилган.
Эслатиб ўтамиз, 24 март кунги йиғилишда давлат раҳбари электр энергия ва газ соҳаси «коррупция қилиш учун ислоҳ қилинмаган», дея таъкидлаганди. Қолаверса, у «Бюджет маблағлари талон-тарож қилинса, прокурорлар ҳам жавобгар бўлади», дея қўшимча қилган.
Шавкат Мирзиёев 16 апрель куни Самарқанд вилоятида фаоллар иштирокидаги йиғилишда коррупцияга масаласига яна бир бор тўхталган эди. «Кимни ҳисобига коррупция бўляпти? Халқимиз ҳисобига. Умид билан яшаган бечора онамиз, синглимиз, опамиз, ўғилларимиз, қизларимизни ҳисобига ўғирлик бўляпти», — дея қайд этганди ўшанда.
Президент 22 апрелдаги видеоселекторда раҳбарларни охирги маротаба огоҳлантирган эди. «Халқимизнинг олдида узр сўраб, охирги марта сизларни [раҳбарларни] огоҳлантирмоқчиман… Битта одамни норози қилиб, 5 доллар олган бўлса ҳам президентнинг сиёсатига хиёнат дейилади», — деб айтган президент.
Шавкат Мирзиёев 30 апрель кунги йиғилишда эса «Ўзсаноатқурилишбанк» ходимларидан бири катта миқдордаги талон-тарожда айбланиб, ҳибсга олинганини таъкидлади. Давлат раҳбари ҳар бир банк раҳбарига «нимада айбланаётганини кўриш, фарзандларини кўз олдига келтириши учун» суд жараёнида иштирок этишни таклиф қилди.
