Ўзбекистон президенти Шавкат Мирзиёев 30 апрель куни ҳудудларда саноатни ривожлантириш масалаларига бағишлаб ўтказилган йиғилишда банк соҳасидаги коррупция ва муаммоларга тўхталиб ўтди.
«Дунёда иқтисодиёт бўйича вазият жуда оғир. Ҳеч кимда осон эмас. Бизнинг яккаю ягона ўзимизнинг йўлимиз бор. Пешона теримиз билан топган пулларимизни халқимизга ҳалол етказиб, натижага эришиш бўйича ҳамма имкониятлар мавжуд», — деди у.
Президентнинг сўзларига кўра, «маҳаллий саноатни ривожлантириш бўйича долзарб вазифа — ҳокимларнинг қўлидаги масала». Соҳада жуда катта ишчи жойи, манфаатдорлик ва одамларнинг рози бўлиши борлиги таъкидланди.
«Ҳар ҳафтада бир марта банк ва солиқ идоралари раҳбарлари билан вилоят ҳокимининг ўзи гаплашади. Ҳар бир туманнинг, ким бўлишидан қатъи назар, банк билан солиқчисининг кўзига қараб баҳо беришларингиз керак. Биздаги ҳамма тўсиқ — банк билан солиқ. Иқтисодиётимизга тўсиқ, катта тўсиқ! Ҳаммангиз хулоса қилишларингиз керак. Халқимиз бизни боқиб олади, олдин халқимизни сал оёққа турғизиб олайлик», — дея таъкидлади Шавкат Мирзиёев.
Давлат раҳбари коррупция илдизи билан йўқ қилинмас экан, ислоҳотлар амалга ошмаслигига урғу қаратди.
«Иқтисод нуқтаи назаридан банкда капитали бўлиши учун қанча пул бераяпмиз? Банк қолармиди шу вақтгача? Банкрот бўларди. Бизда ҳам чет элдан келиб банкимизни сотиб оладиганлар жуда кўп, мен бунга рухсат бермаяпман. Ўзимизнинг халқимизга ўзимиз хизмат қилишни ўрганайлик, деяпман», — деди у.
Март ойи охирида «Газета.uz» Венгриянинг ОТP Bank банки Ўзбекистонда «Ипотекабанк»ни хусусийлаштиришда иштирок этиши ҳақида хабар қилган эди.
