Жума куни ЮНИСЕФнинг Ўзбекистондаги ваколатхонаси раҳбари Мунир Мамедзаде ҳам бошқа халқаро ташкилотлар вакиллари қаторида COVID-19`га қарши эмланди, дея хабар бермоқда «Газета.uz» мухбири. У шу кунларда коронавирусга қарши даволангани ва соғлиғи яхшилангач эмланишга қарор қилганини қўшимча қилди.

Суҳбат давомида ЮНИСЕФ раҳбари COVAX дастури доирасида вакцинанинг кейинги партияси қачон олиб келинишига ҳам тўхталиб ўтган.

«Дастлаб май ойида вакцинанинг қолган қисмини олиб келишни режа қилган эдик. Вакцина Ҳиндистонда ишлаб чиқарилиши ва у ердаги ҳозирги (эпидемиологик — таҳр.) вазиятни инобатга олган ҳолда, етказиб беришда кичик кечикишлар бўлиши ҳақида бизни ва ўз навбатида ҳукуматни расман хабардор қилишди. Шунга қарамасдан, биз июнь ойида дозалар ўртасида жуда катта фарқ бўлмаган тарзда етказиб берилишига умид қиламиз», — деди у.

ЮНИСЕФнинг Ўзбекистондаги ваколатхонаси раҳбари Мунир Мамедзаде. Фото: UNICEF.

Шунингдек, Ҳиндистонда эпидемиологик вазият кескинлашса, вакциналар бошқа мамлакатлардан олиб келиниши мумкинлиги айтилди.

«Агар Ҳиндистонда вазиятни қўлга олиш қийинлашса, унда муқобил вариантларни кўриб чиқиш масаласи глобал миқёсда муҳокама қилинмоқда. Чунки, ушбу вакцина Корея Республикасида ҳам ишлаб чиқарилади. Шу билан бирга бошқа вариантлар ҳам кўриб чиқилмоқда. Умид қиламизки, яқин кунларда бу ҳал бўлади. Биз логистика ва бошқа барча ташкилий жараёнларни ҳал қилганмиз. Асосийси етарли миқдорда вакциналар ишлаб чиқарилишида, вакцина тайёр бўлиши билан биз етказиб бериш чорасини кўрамиз», — деди Мунир Мамедзаде.

COVAX дастури бўйича Ўзбекистонга 2 млн 256 минг доза AstraZeneca вакцинасини етказиб бериш режа қилинган. 17 март куни Тошкентда унинг биринчи партияси — 660 минг доза қабул қилиб олинган эди.

Халқаро ташкилот раҳбарининг таъкидлашича, дастурдан ташқари вакцина харид қилиш масаласи эмлаш бўйича миллий режага мувофиқ тартибга солинади ва ҳал этилади. «Ушбу режага асосан жорий йил охиригача вакцина билан мамлакат аҳолисининг 20 фоизини қамраб олиш кўзланган», — деди ЮНИСЕФ раҳбари.

Мунир Мамедзаденинг қўшимча қилишича, Ўзбекистондаги хорижий ташкилотлар ва дипкорпуслар раҳбар ва ходимлари гуманитар ёрдамдан ташқари, БМТ томонидан харид қилинган AstraZeneca вакцинаси билан ўз хоҳишига кўра эмланмоқда.

CCВнинг маълумотига кўра, 1 апрелдан шу кунгача 718 471 фуқаро коронавирусга қарши эмланган.

Вакциналар кесимида эмланиш ҳолати:

  • AstraZeneca — 323 772 нафар;
  • Хитой-ўзбек (ZF-UZ-VAC2001) — 391 478 нафар;
  • «Спутник V» (Гам-КОВИД-Вак) — 3221 нафар.

«Газета.uz» 27 апрель куни Ўзбекистонга яна 1 млн доза хитой-ўзбек вакцинаси олиб келингани ҳақида ёзган эди. Ҳозирги кунгача эмланганларнинг 46 фоизи айнан ушбу вакцинани танлаган. Ўзбек-хитой вакцинасининг 1 млн дозалик аввалги партияси 27 март куни келтирилган эди.

Шуни куни яна «Спутник V»нинг иккинчи партияси — 50 минг доза вакцина ҳам олиб келинди. Унинг дастлабки партияси қанча миқдорда келтирилгани ҳақида маълумот берилмаган эди. Умумий сотиб олинган «Спутник V» вакциналари нархининг ярми тадбиркор Алишер Усмонов томонидан молиялаштирилди.