Қашқадарё вилоятида баландлиги 62,5 метрга тенг давлат байроғини ўрнатиш режалаштирилмоқда, дея хабар бермоқда «Қашқадарё» газетаси.
Унга кўра, Мустақилликнинг 30 йиллиги арафасида Қарши шаҳридаги Мустақиллик майдонида баландлиги 62,5 метрга тенг давлат байроғи ўрнатилади.
Маълум қилинишича, давлат байроғининг биргина устунини бунёд этишга 1 млрд 350 млн сўм маблағ сарфланади. Объект буюртмачиси Қарши шаҳар ободонлаштириш бошқармаси, пудратчиси эса «Воҳа махсус монтаж сервис» МЧЖ ҳисобланади.
Фото: «Қашқадарё» газетаси
Корхона вакилларининг айтишича, байроқнинг устуни (флагшток) диаметри 430 миллиметрдан 1220 миллиметргача бўлган пўлат қувурлардан ташкил топади. Унинг барча бутловчи қисмлари махсус буюртма асосида пойтахтдаги «Бектемир металл конструкциялари» қўшма корхонаси томонидан тайёрланган. Бичими 25 метрга 10 метрдан иборат байроқнинг ўзи эса Фарғона водийсидаги ишлаб чиқариш корхоналаридан бирида тикилган.
Лойиҳага кўра, Давлат байроғи ўрнатилгач, унинг атрофидаги 2 минг квадрат метрлик ҳудуд ободонлаштирилиб, майсазор ва гулзорлар барпо этилади, манзарали дарахтлар экилади ва янги йўлакбоп плиткалар териб чиқилади. Мустақиллик майдонининг шу қисмида байроқнинг тарихи ва тавсифи акс этган тош лавҳлар ҳам ўрнатилади.
