«Ўзбектелеком» АК халқаро пакетли коммутация марказининг ўтказувчанлик қобилияти кенгайтирилиб, интернет тезлиги 1800 Гбит/секундга етказилади. Бу борадаги лойиҳанинг параметрлари Вазирлар Маҳкамасининг 17 апрелдаги қарорида белгиланган, дея хабар берди Normа. Ҳужжатда лойиҳани амалга ошириш муддати кўрсатилмаган.
Ҳужжатга кўра, лойиҳа танловда ғолиб чиққан АҚШнинг Winncom Technologies компанияси томонидан амалга оширилади.
Лойиҳанинг техник-иқтисодий асоси бўйича умумий қиймати 25,9 млн долларни ташкил этади:
- «Ўзбектелеком» АК BNG ва DPI қурилмаларининг ўтказувчанлик қобилиятини кенгайтириш учун — 4,97 млн доллар:
- «Ўзбектелеком» АК маълумотлар узатиш тармоғининг ўтказувчанлик қобилиятини кенгайтириш учун — 4,99 млн доллар;
- «Ўзбектелеком» АК халқаро пакетли коммутация марказини ўтказувчанлик қобилиятини кенгайтириш учун — 4,98 млн доллар;
- «Ўзбектелеком» АК маълумотлар узатиш ядро тармоғида хизматлар кўрсатишнинг ўтказувчанлик қобилиятини кенгайтириш учун — 4,99 млн долларлик машина ва ускуналар харид қилиниши маълумот учун қабул қилинди.
Лойиҳа «Алоқабанк»нинг умумий қиймати 19,9 млн доллар миқдоридаги кредити, шунингдек, «Ўзбектелеком» АКнинг 5,9 млн доллар миқдоридаги ўз маблағлари ҳисобида молиялаштирилади.
Эслатиб ўтамиз, сўнгги бор интернет-каналнинг кенгайтирилиши 2018 йилда Ўзбекистонда амалга оширилган эди. Ўшанда каналнинг тезлиги 110 дан 1200 Гбит/с гача етказилган эди.
