АҚШ президенти Жо Байден сешанба куни COVID-19'га қарши тўлиқ эмланган америкаликларга ниқобсиз кўчага чиқиши мумкинлигини эълон қилди, дея хабар бермоқда The Guardian.
Шунингдек, касалликларни назорат қилиш ва олдини олиш марказлари (CDC) ҳам тўлиқ эмланган одамлар унчалик катта бўлмаган гуруҳларда ниқобсиз юриш, велосипедда ҳаракатланиш, мулоқот қилиш ёки очиқ ҳавода овқатланишлари мумкинлиги тўғрисида кўрсатмаларни янгилашди. Бироқ, концертларга, спорт мусобақаларига, шунингдек сартарошхоналарга, кинотеатрларга, музейларга, савдо марказларига ташриф буюрганда, барибир ниқоб тақиш талаб қилинади.
Жо Байденнинг сўзларига кўра, АҚШда аллақачон 215 миллион миқдорда эмлаш ишлари амалга оширилган ва COVID-19 билан касалланиш ҳамда ўлимлар сони «кескин камайган». Мамлакатдаги қарияларнинг учдан икки қисми тўлиқ эмланган, ушбу гуруҳдаги ўлим даражаси 80% га, касалхонага ётқизиш эса 70% га камайди. Оқ уй раҳбари буни вакцина қабул қилиш учун яна бир яхши сабаб дея таъкидлади ва фуқаролардан тезроқ эмланишни сўради.
Жонс Хопкинс университети маълумотларига кўра, пандемия бошланганидан бери АҚШда 32,1 млндан ортиқ коронавирус инфекцияси юқтириш ҳолатлари аниқланган ва бунинг оқибатида 573 минг киши вафот этган. Мамлакат иккала кўрсаткич бўйича ҳам дунёда биринчи ўринда турибди.
