Соғлиқни сақлаш вазирлиги матбуот хизматининг хабарига кўра, 27 апрелга ўтар кечаси Ўзбекистонга коронавирусга қарши «Спутник V» вакцинасининг яна бир партияси етиб келди.
Россиянинг Ўзбекистондаги элчихонасининг маълум қилишича, етказиб берилган навбатдаги вакциналар партияси 50 минг дозадан иборат бўлиб, 23 апрель куни етказиб берилганвакциналарнинг иккинчи компоненти ҳисобланади.
Маълум қилинишича, Ўзбекистонда ушбу вакцинанинг биринчи компоненти билан эмлаш жараёни шу ҳафта бошланади.
Маълумот учун, умумий сотиб олинган «Спутник V» вакциналари нархининг ярми тадбиркор Алишер Усмонов томонидан молиялаштирилди.
Яқин кунларда мамлакатга ZF-UZ-VAC2001 ўзбек-хитой вакцинаси ҳамда AstraZeneca вакцинасининг қўшимча дозалари етказиб берилиши кутилмоқда, дея қўшимча қилди Соғлиқни сақлаш вазирлиги.
ССВнинг маълум қилишича, 26 апрель ҳолатига кўра, Ўзбекистонда COVID-19'га қарши эмланганлар сони 565 мингга етди.
