23 апрелдан 24 апрелга ўтар кечаси Тошкентнинг «Пахтакор» жамоаси Осиё Чемпионлар Лигаси доирасида БАА футбол клуби «Шаржа»га қарши тўп сурди.
Биринчи бўлимда Дердийок, Ҳожимат Эркинов ва Хожиакбар Алижоновнинг зарбаларидан сўнг «Шаржа» посбони маҳорат кўрсатди. Драган Черан ва Диёр Холматовнинг зарбаларига эса аниқлик етишмади. Иккинчи бўлимда Хожиакбар Алижоновнинг узатмасидан сўнг Дердийок яқин масофадан дарвозани ишғол қилди. 87-дақиқада «Шаржа» ҳисобни тенглаштирди. Шу тариқа мазкур баҳсда «Пахтакор» дуранг билан кифояланди.
Учрашувдан кейинги матбуот анжуманида «Пахтакор» бош мураббийи Питер Хюистра қуйидаги фикрларни билдириб ўтди.
«Ўйинни вақтлироқ тугатишимиз керак эди. Жуда кўплаб вазиятлар яратдик, ўйинни тўлиқ назорат қилдик. Кўпроқ гол урсак бўларди. Голни эса ён қанот ҳакамининг тушунарсиз тарзда байроғини кўтарганидан сўнг ўтказдик. Футболчилар ўша ҳолатда тўхтаб қолишди. 70% тўпни назорат қилиб бир очкони қўлга киритиш жуда аламли», — деди Хюистра.
Маълумот учун, гуруҳда 4-турдан кейин «Шаржа» 8 очко билан пешқадамликни сақлаб турган бўлса, «Пахтакор» 3 очко билан учинчи ўринда бормоқда.
Эслатиб ўтамиз, бугун Олмалиқнинг АГМК жамоаси ОЧЛдаги 4-тур баҳсини БААнинг «Шабаб Ал Аҳли» клубига қарши ўтказади. Мазкур баҳс Тошкент вақти билан 00:00 да бошланади.
