Блогер Шаҳноза Соатова Тошкентдаги мактаблардан бирида дарс пайти болаларнинг оёқ кийимини ечтириб, пайпоғини калта ёки узунлигини текширилгани ва мазкур ҳолатга эса ЛГБТга қарши кураш деб тушунтириш берилгани ҳақида хабар берган эди.
Халқ таълими вазирлиги мазкур ҳолатни тўлиқ ўрганиб, воқеа бўйича расмий муносабат билдирди.
«Афсуски, баъзи ота-оналар фарзандининг тарбияси билан шуғулланиш ўрнига уни ортиқча эркалатиб, ўқитувчи ва мактабни айблаб, айниқса бугун ўзи етарли бўлмаган эркак ўқитувчиларни ишига халал беришни афзал кўрмоқда. Блогер томонидан шов-шув қилиб кўтарилган ва тизим имижига жуда салбий таъсир қилган 110-мактабдаги ҳолат ўрганилди, — дея вазирлик видеолавҳани тақдим этган.
Хабарда айтилишича, видеотасвирдаги ҳолат 110-умумтаълим мактабининг чақирувга қадар бошланғич тайёргарлик фани ўқитувчиси ҳамда директор ўринбосари ўқувчининг телефон ўйнаб ўтирганини ҳамда ўқитувчига нисбатан ҳурматсизликни кўриб, синфга киришга мажбур бўлган вақтида юз берган. Телефон билан боғлиқ ҳолат муҳокамасидан сўнг, ўқувчиларнинг ўзларини дарсда тутишлари, ўқитувчига ҳурмат, дарсга эътибор қилиш, жисмоний тарбия кийимида дарсда ўтирмаслик каби масалалар кўтарилган.
ХТВ таъкидлашича, видеотасвирни диққат билан кузатилса, ўқитувчи томонидан дарс сўнггигача муҳокамаларга сабаб бўлган мавзу (ЛГБТ) ҳақида сўз бормаган. Мазкур мавзу эса танаффусга қўнғироқ чалинганидан сўнг ўқитувчи томонидан ўқувчи қизнинг нега бундай кийимга эътибор қилаяпсизлар деган мазмундаги саволига жавоб тарзидаги шахсий фикри сифатида айтилганлиги маълум бўлди, деб ёзади вазирлик.
Видеода директор ўринбосари ўқувчиларнинг бири пайпоқ киймаганлигига эътибор қаратганини кўриш мумкин. Чақирувга қадар бошланғич тайёргарлик фани ўқитувчиси унга мурожаат қилиб, савол беради:
«Нима учун пайпоқсиз? Бизда нима, ЛГБТми? Олий Мажлис мактабларимизда пайпоқсиз юришни тақиқлаган. Пайпоқ йўқ, кўрмаяпман». Шундан сўнг, ўқувчидан оёқ қийимини ечиш сўралган. Ўқувчи калта пайпоқ кийганлигини кўриб, «бу пайпоқ эмас» дея таъкидлаган. Директор ўринбосари ўқувчининг ота-онасини чақиришини айтган. Чақирувга қадар бошланғич тайёргарлик фани ўқитувчиси ўқувчига «эртадан „нормальный“ пайпоқ кий. Олий Мажлис бу масала билан шуғулланаяпти», дейди. «Биз Тошкентда ЛГБТ бўлишига йўл қўймаймиз», дейди ўқитувчи.
Директор ўринбосари ўғил бола ўқувчиларга мурожаат қилиб: «Агарда носки киймай, мана шунақа носки кийгин, қўпол айтганда, каллангни узиб қўяман ҳаммангни», дейди.
Вазирлик баёнотига кўра, бу ҳолат блогер айтганидек 20 дақиқа эмас, 9 дақиқа давом этган.
«Ўзбек тили дарси бузилди деб жар солаётган ўзбек тили ҳимоячиси, ўқувчиларнинг ўзбек тили ўқитувчисини ва дарсни қанчалик беҳурмат қилаётганини ҳам ушбу видеодан холис ўрганиб, ота-оналарни ҳам ўз фарзандлари тарбиясига эътиборлироқ бўлишга чақиришини истаб қолардик», — дейилади хабарда.
Вазирлик хабарига асосан, ўқувчиларнинг хатти-ҳаракатлари туфайли 2 нафар эркак ўқитувчи бироз қизишиб гапирган ва директор ўринбосари келгусида бундай ҳолатга йўл қўймаслик бўйича огоҳлантирилган.
