22−23 апрель кунлари пойтахтда Ҳуқуқ 4.0. Тўртинчи саноат инқилоби шароитида ҳуқуқнинг кўриниши мавзусида «Tashkent Law Spring» II халқаро юридик форуми бўлиб ўтмоқда.
Унинг биринчи кунида Сингапур, Россия, Буюк Британия, Япония, Корея Республикаси, Қозоғистон, Озайбайжон, Беларус, Шри-Ланка ва бошқа давлатларнинг адлия вазирлари, ҳуқуқий соҳа етакчилари, халқаро такшилотлар ва юридик фирмалар етакчилари қатнашди.
Улар қаторида нутқ сўзлаган Олий Мажлис Қонунчилик палатаси спикерининг биринчи ўринбосари, Инсон ҳуқуқлари бўйича Ўзбекистон Миллий марказининг директори Акмал Саидов янги Ўзбекистонда илгари номи айтилмаган ташкилотларга тегишли қонунлар ҳам ишлаб чиқилганини таъкидлади. Бу ҳақда «Газета.uz» мухбири хабар бермоқда.
«Янги Ўзбекистон фаолиятининг янги ҳуқуқий асослари яратила бошланди. Ҳозир у тўғрисида махсус норматив-ҳуқуқий ҳужжат қабул қилинмаган бирорта давлат органи йўқ. Олдин умуман айтиб бўлмайдиган қонунлар доирасида ҳам масалан, ДХХ тўғрисида бўладими, ИИВ тўғрисида бўладими барча органлар тўғрисида ҳозир мустаҳкам ҳуқуқий асослар яратилди ва бу давом этаяпти», — деди у.
Қуйи палата спикерининг ўринбосари айни вақт мамлакатда яна 12 та янги кодекс ишлаб чиқилаётганини маълум қилди.
«Наполеон вақтида 5 тагина классик кодекс бўлган. Ўзбекистонда 18 та кодекс қабул қилинган ва ҳозир 12 та янги кодексни ишлаб чиқиш устида ишлар кетмоқда. Демак бизда ҳақиқатан ҳам янги ҳуқуқий сиёсат шаклланди. Айтиш мумкинки, ҳозирги кунда ҳуқуқий гильотина деган феномен намоён бўлди. Гильотина — сўзи ана шуни кашф этган инсоннинг исми билан боғлиқ. Биз эса ҳуқуқий гильотина ҳақида гапиряпмиз. Жамиятнинг тараққиётига тўсиқ бўлаётган, кераксиз норматив-ҳуқуқий ҳужжатлар амалда ҳалақит бермасин деб, уларни кесиб ташлаяпмиз. Чунки қонунлар жамиятни тараққиётига хизмат қилиши керак», — деди Саидов.
У шунингдек, давлат раҳбари юридик таълимга алоҳида эътибор қаратаётганини қўшимча қилди.
«2015 йил Ўзбекистонда (ОТМга — таҳр.) қабул қилинган талабаларнинг фақатгина 1 фоизи юристлар бўлибди. Ўша вақтда мактаб битирувчиларининг 9 фоизигина олий ўқув юртларига кира олган. Ҳозир бу рақамни 25 фоизга, юристларни тайёрлашни ҳам оширдик. Сўнгги уч йилда 4та ҳудудда (мавжуд ОТМларда — таҳр.) юридик факультет очилди», — деди миллий марказ раҳбари.
Акмал Саидовнинг таъкидлашича, «юридик билим ва кадрсиз ҳеч қандай тараққиётга эришиб бўлмайди».
Аввалроқ, ушбу халқаро форумда Ўзбекистон адлия вазири Русланбек Давлетов карантинга олингани сабабли онлайн иштирок этгани ҳамда очиқлик ва шаффофликни таъминлашга доир бир қанча таклифларни илгари сургани ҳақида ёзган эдик.
Унинг таъкидлашича, «ҳозир ҳам рақамлаштиришга қарши яширин қаршиликлар йўқ эмас». Бу биринчи навбатда эскича ишлашга ўрганган айрим мансабдорлар ва ташкилотларга тааллуқли.
Қолаверса, адлия вазири: «амалдорларнинг кўчмас мулклари ва машиналари тўғрисидаги маълумотлар очиқланиши керак», — дея қўшимча қилган эди.
