Адлия вазири Русланбек Давлетовнинг таъкидлашича, «ҳозир ҳам рақамлаштиришга қарши яширин қаршиликлар йўқ эмас». Бу биринчи навбатда эскича ишлашга ўрганган айрим мансабдорлар ва ташкилотларга тааллуқли.
Бу ҳақда вазир 22 апрель куни «Tashkent Law Spring» II халқаро юридик форумининг очилиш маросимида айтиб ўтди, дея хабар бермоқда «Газета.uz» мухбири. Русланбек Давлетов карантинга олингани боис халқаро форумда онлайн тарзда иштирок этган.
«Албатта, жамият хоҳлаётган очиқлик, ҳисобдорлик, бюрократия ва коррупциядан холи бўлишни барча ташкилотлар бир хилда тушунмайди ва қабул қилмайди. Кўникмаган бу қадриятларга, — дея сўзида давом этди Давлетов, — Рақамлаштириш ва очиқлик эса умуман янгича улардан ишлашни талаб қилади. Биргина давлат харидларидаги очиқлик қанчалик бу иллатларга зарба бермоқда, биз буни олқишлаймиз, барибир энди замон бошқача, ўзгармаса ташкилотлар халқ ишончини оқламайди, бу эса уларни шубҳасиз инқирозга етаклайди».
У бунинг учун барчага бирдек тушунарли бўлган ҳар бир соҳада очиқлик таъминлаш стандартлари яратилиши лозимлигини таъкидлади. Уларни ўқиган ҳар бир киши бир хилда тушуниб, тегишли талабни қўя олиши керак.
«Иккинчидан, худди шундай рақамлаштиришнинг минимал талаблари бўлиши керакки, ташкилотлар ўз фаолиятида мажбур шу дастурлардан минимал равишда фойдаланиши керак. Жамоатчилик ҳам талаб қила олиши керак», — деди Русланбек Давлетов.
Вазир Ўзбекистон учун рақамлаштириш ва очиқлик бўйича устувор соҳаларни белгилаб олиш кераклигига эътибор қаратди.
«Чунки йўналиш кўп, муаммо етарли, ресурслар танқислигини эътиборга олиб энг биринчи навбатда қилиниши керак бўлган ва давлат томонидан молиялаштирилиши ва қўллаб қувватланиши керак бўлган йўналишлари белгиланиши керак», — деб унинг сўзларидан иқтибос келтирмоқда «Газета.uz» мухбири.
Ҳуқуқшунос бу борада очиқланишини лозим бўлган бир қатор масалаларни санаб ўтди.
«Масалан, биринчи навбатда бюджет пулларини сарфланиши очиқлигининг янги босқичи, айниқса долзарб бўлган автомобиль йўлларга кетаётган харажатлар, аниқ манзиллари билан интерактив карталарда кўриниши керак, ҳар бир ташкилотнинг ўз маъмурий биноларини таъмирлашга кетказаётган харажатлари, амалдорларнинг кўчмас мулклари ва машиналари тўғрисидаги маълумотлар очиқланиши керак», — дейди Давлетов.
У форумга ташриф буюрганларни мазкур жумбоқларни биргаликда ечиш, ўлаш ва таҳлил қилиш учун Тошкент ҳуқуқ баҳори платформаси доирасида очиқ ва конструктив мулоқотга чорлади.
«Умуман, тўртинчи саноат инқилоби шароитида ҳуқуқий институтларга янгича назар ташлаш ва анъанавий ҳуқуқий механизмларни янги воқеликка изчил мослаштириш йўлларини биргаликда ўйлайлик», — деди вазир.
