Россияда Навальнийни қўллаб-қувватлаш учун митинглар бўлиб ўтмоқда

21 апрель куни Россияда мухолифат етакчиси Aлексей Навальнийни қўллаб-қувватлаш учун митинглар бўлиб ўтмоқда. Март охирида Навальний очлик эълон қилган эди ва ҳозирда унинг саломатлиги ёмонлашаётгани ҳақида хабарлар тарқалган. Таъкидланишича, сиёсатчига керакли тиббий ёрдам кўрсатилаётгани йўқ. Унинг тарафдорлари Россиянинг юздан ортиқ шаҳарларида ва унинг чегараларидан ташқарида яна ўнлаб шаҳарларда норозилик акциялари ҳақида эълон қилди. Шу билан бирга, Россия ҳукумати ушбу ҳаракатларни маъқулламади, барча шаҳарларда ҳуқуқ-тартибот ходимлари майдонларни қўриқлашга юборилди. Tayga.info маълумотларига кўра, энг йирик намойишлар Новосибирск (4 минг), Иркутск (2 минг), Омск (3 мингга яқин), Москва ва Санкт-Петербург шаҳарларида бўлиб ўтмоқда. Намойишчилар Навальний ва ҳукумат билан боғлиқ ҳар хил шиорларни айтмоқда. Маълум қилинишича, 400дан ортиқ киши ҳибсга олинди. — Meduza.

Февраль ойида суд Алексей Навальнийга тайинланган шартли ҳукмни қамоқ жазосига ўзгартириб, уни 3,5 йилгача озодликдан маҳрум қилгани ҳақида хабар берган эдик. Сиёсатчи умумий режимдаги колонияга жойлаштирилди.


2020 йилда дунёда қатл этилганлар сони сўнгги 10 йил ичида энг паст кўрсаткични ташкил этди

Ўтган йили дунёда қатл этилганлар сони сўнгги 10 йил ичида энг паст кўрсаткични ташкил этди. Бу ҳақда Amnesty International нодавлат ташкилоти томонидан эълон қилинган ҳисоботда айтилган. Тадқиқотда таъкидланганидек, ўтган йили камида 483 киши қатл этилган. Таққослаш учун: 2019 йилда қатл этилганлар сони 657 кишини ташкил этган бўлса, 2015 бу кўрсаткич амалдагидан 70 фоизга кўпроқ бўлиб, 1634 тани ташкил қилган.

Хитой дунёда қатл этиш бўйича 2020 йилда энг юқори кўрсаткичга эга. «2020 йилда маълум бўлган қатлларнинг аксарияти Хитой, Эрон, Миср ва Саудия Aрабистонида бўлган», — дейилади ташкилот ҳисоботида. Умуман олганда, ўтган йили дунёда қатл қилинганлар сони камайди. Ташкилот 18 мамлакатда камида 483 қатлни қайд этди, бу 2019 йилдан 26 фоизга кам. Ўлим жазолари сони ҳам камайди — 2019 йилдаги 2307 дан 2020 йилда 1477 тага. Умуман олганда, ўтган йили дунёда 28567 киши ўлимга маҳкум этилган. Хитойдан ташқари, 2020 йилда 88 фоиз қатл этилишлар тўрт давлатга тўғри келган: Эрон, Миср, Ироқ ва Саудия Aрабистони. Яқин Шарқда Эрон қатл этилишлар сони бўйича етакчилик қилмоқда. 2020 йилда мамлакатда 246 ўлим жазоси ижро этилди. Қўшни Ироқда қатл этилганлар сони икки баравар кўпайди. Бунга судларнинг пандемия пайтида ёпилиши сабаб бўлган, дея ёзмоқда ташкилот. Мисрда ўтган йили маҳбуслар 2019 йилга нисбатан уч баравар кўп қатл қилинган, Саудия Aрабистонида эса, аксинча, 85 фоизга кўрсаткич камайган. Associated Press’нинг ёзишича, қироллик гиёҳванд моддалар билан боғлиқ жиноятлар учун қатл қилишни тўхтатган, шунингдек вояга етмаганларга ўлим жазосини бекор қилган.

Ҳозирда 144 мамлакатда ўлим жазоси тақиқланган ёки қўлланилмайди. — Amnesty International.


Сурияда президент сайловларида илк бор аёл киши қатнашади

Бу биринчи марта аёлнинг Суриядаги президентлик сайловларига номзод сифатида рўйхатдан ўтказилиши, деди Сурия парламенти раиси Ҳаммуд Саббаҳ. Associated Press’нинг хабар беришича, 50 ёшли дамашқлик Фатен Aли Наҳар мустақил равишда президентлик сайловларида иштирок этишга қарор қилди. Шу билан бирга, у ҳақида тафсилотлар маълум эмас. Ундан ташқари яна икки киши давлат раҳбари лавозими учун курашда иштирок этишларини эълон қилишди. Улардан бири 2014 йилги президент сайловларида қатнашган, аммо Сурияни 2000 йилдан бери бошқариб келаётган Башар Aсадга ютқазган эди. Амалдаги мамлакат президенти Башар Aсад ҳам ўз номзодини илгари сурган. Суриядаги президентлик сайловлари 26 май куни бўлиб ўтади. — Associated Press.


Буюк Британия COVID-19га қарши дори ишлаб чиқаришни бошлайди

Буюк Британия бош вазири Борис Жонсон мамлакатда уй шароитида COVID-19 касаллигини даволовчи воситани ишлаб чиқара бошлаганини маълум қилди. Бу ҳақда BBC News веб-сайтида хабар берилган. Бош вазир таблетка ёки капсулалар кўринишидаги препарат кузга қадар пайдо бўлишига ва пандемиянинг кутилаётган учинчи тўлқинига қарши курашишда ёрдам беришига умид билдирди. Ҳозирда препаратни ишлаб чиқиш ва келгусидаги синовларни назорат қилиш учун ишчи гуруҳ тузилмоқда. Жонсон чет элда касаллар сони тобора кўпайиб бораётганини ва пандемиянинг янги тўлқини эҳтимоли ҳақида таъкидлади. «Биз, иложи борича, бошқа касалликлар билан яшаганимиз каби, ушбу касаллик билан яшашни ўрганишимиз керак», дея қўшимча қилди у. Вирусга қарши дорилар эмлаш ва оммавий [ПЗР] синовлар билан бир қаторда коронавирусга қарши курашнинг учинчи усули бўлиши мумкин, деб таъкидлади Британия бош вазири. — BBC News.

Аввалроқ, Буюк Британия пандемияларга қарши курашиш бўйича халқаро экспертлар гуруҳи ташкил этилишини эълон қилган эди.


Япония коронавируснинг кенг тарқалиши туфайли Токио ва икки ҳудудда фавқулодда ҳолат режимини жорий этади

Япония ҳукумати Олимпия ўйинлари бошланишидан уч ой олдин коронавирус билан касалланиш кўпайгани муносабати билан мамлакат пойтахтида фавқулодда режим жорий этишни режалаштирмоқда. Хабарга кўра, ҳукумат Токиода, шунингдек Осака ва Хиого префектураларида чекловларни кучайтириш ҳақида эълон қилишга тайёрланмоқда. Ушбу режимга кўра, айтиб ўтилган шаҳарларда дўконлар, истироҳат боғлари ва бошқа объектлар ёпилиши мумкин. Токионинг ўзида 29 апрелдан 9 майгача фавқулодда режими жорий этилиши кутилмоқда. — Kyodo.

Март ойида Токио Олимпия ўйинлари ташкилий қўмитаси Халқаро олимпия қўмитаси ва Халқаро паралимпия қўмитаси раҳбарлари билан учрашувидан сўнг, коронавирус тарқалишининг олдини олиш мақсадида чет элдан томошабинлар келиши тақиқланди.

Япониядаги ёзги Олимпия ўйинлари COVID-19 пандемияси сабабли бир йилга қолдирилган эди. Ўйинлар ўз номини сақлаб қолади — «Токио-2020». Мусобақалар 2021 йил 23 июлдан 8 августгача Токиода бўлиб ўтади.


Ҳиндистонда тўрт кун ичида коронавирус инфекцияси қайд этилганлар сони 1 млн нафарни ташкил этди

Ҳиндистондаги эпидемиологик вазият ёмонлашишда давом этмоқда: тўрт кун ичида мамлакатда миллионта янги касалланиш ҳолатлари қайд этилди. Aввалроқ, олти кун ичида мамлакатда миллионта янги ҳолатлар қайд этилар эди. Ҳиндистон бош вазири Нарендра Моди карантин чораларини кучайтиришга қаршилик кўрсатмоқда. «Мен штатларни локдаунни сўнгги чора сифатида кўриб чиқишга чақираман. Улар (штатлар) касалликни юқтириш микро-зоналарига эътибор беришга ҳаракат қилишлари керак», — деди Моди. Маълумотларга кўра, реанимация бўлимларида ётоқ ва тиббий кислород етишмовчилиги кузатилмоқда. Деҳли бош вазири Aрвинд Кежривалнинг айтишича, агар янги юқтиришлар сони камаймаса, соғлиқни сақлаш тизими қулаши мумкин. Ҳиндистонда пандемия бошланганидан буён 15 млндан ортиқ одам коронавирус билан касалланган, 180 мингдан ортиғи вафот этган. — Times of India.


Apple янгиланган маҳсулотларини тақдим этди

Фото: Етти рангдаги iMac компьютери / apple.com

Apple компанияси янгиланган қурилмаларини тақдим этди, улар янги рангдаги iPhone 12 ва iMac компьютеридир. Янги iPhone 12 бинафша рангли корпусда намойиш қилинди. Бинафша рангли қурилманинг техник хусусиятлари 2020 йил сентябрь ойида тақдим этилган iPhone 12 билан бир хил. Шунингдек, компаниянинг янги модели — бу катта моделга ўхшаш хусусиятларга эга iPhone 12 mini. Тақдимотда янги Apple M1 процессорига эга бўлган iMac компьютери намойиш этилди. Янги iMac’лар бирданига етти рангда мавжуд: кўк, яшил, сариқ, қизил, бинафша, тўқ сариқ ва кумуш. Яна бир янги қўшимча — М1 процессорига эга iPad Pro. — Apple.