19 апрель куни Президент Шавкат Мирзиёев Uzbekistan Airways авиакомпаниясини трансформация қилиш чора-тадбирлари тақдимоти билан танишди, дея хабар бермоқда давлат раҳбари матбуот хизмати.
Компания трансформациясининг асосий йўналиши самарадорликни оширишга қаратилган. Масалан, Uzbekistan Airways харажатларни 46,5 миллион долларга камайтириш кутилмоқда. Бунинг учун қуйидагилар режалаштирилган:
- компания ва унинг таркибий ташкилотлари штатини 20 фоизга қисқартириш. Бу харажатларни 3,9 миллион долларга камайтиради. Муддати — 2021 йил июль;
- чет элда 20 та самарасиз офисни ёпиш — Россиядаги 15 та офисдан 11 таси, шунингдек Амритсар, Мумбай, Париж, Милан, Рим, Токио, Бангкок, Жакарта ва Куала-Лумпурдаги (3,5 миллион доллар). Муддати — июнь;
- авиакомпаниянинг БАА ва Хитойдаги икки минтақавий ва асосий вакилларининг лавозимларини бекор қилиш (400 минг доллар). Муддати — июнь;
- фойдаланилмаётган 12 та самолётни — бешта Ил-76 ва эттита Ил-114 (380 минг доллар — самолётга техник хизмат кўрсатиш харажатлари) эксплуатациядан чиқариш. Муддати — ноябрь;
- 9 та норентабел рейсларни бекор қилиш — Париж, Рим, Милан, Амритсар, Мумбай, Бангкок, Токио, Куала-Лумпур ва Жакартага (12,3 миллион доллар). Муддати — май;
- Россия, Қозоғистон, Ҳиндистон, Покистон, Исроил ва АҚШдаги (5 миллион доллар) чипталарни сотиш бўйича 6 йирик агент билан тузилган шартномаларни бекор қилиш. Муддати — май;
- хорижий агентларнинг авиачипталарни сотиш бўйича комиссияларини 9 фоиздан 5 фоизгача (2,9 миллион доллар) камайтириш. Муддати — май;
- тендер асосида ёқилғи-мойлаш материалларини сотиб олиш орқали харажатларни камайтириш (18,1 миллион доллар). Муддати — июнь.
Авиакомпания йўналишларидаги тақдимотга кўра, 12 та рейсни тўхтатиш ва Киевга янги рейсни амалга ошириш режалаштирилган.
Кўзланган асосий мақсад даромадларни йилига 40 миллион долларга ошириш. Бунинг учун оммабоп йўналишларга 14 та чартер рейсларни жорий этиш ва янги йўналишларда юкларни ташиш, барча ички рейсларда онлайн рўйхатдан ўтиш ва жой танлаш имкониятини яратиш режалаштирилган.
Янги бизнес стратегиясига мувофиқ, хизматларнинг гибрид моделига ўтиш режалаштирилган бўлиб, унга кўра парвозларнинг бир қисми тўлиқ хизмат кўрсатиш ташувчиси (full service carrier), баъзилари эса арзон нархлардаги ташувчи тамойили бўйича амалга оширилади (low cost carrier). Талаб катта бўлмаган йўналишларда қуйи синфдаги ўриндиқлар кўпайиши билан бизнес-класс бекор қилинади. Лоукостер акцияларининг 51 фоизини инвесторга сотиш режалаштирилган.
2021 йилнинг учинчи чорагидан бошлаб 4 та Airbus А320 самолётида арзон парвозларни амалга ошириш режалаштирилган. Узоқ масофали йўналишларни ривожлантириш учун 3 та Airbus А321 NEO LR самолётларини ижарага бериш режалаштирилган. Ички рейслар сонини ҳафтада ҳозирги 17 тадан 49 тага етказиш режалаштирилган.
Йўловчиларга қулайлик яратиш мақсадида соҳани рақамлаштириш, шу жумладан, «Aerolabs» онлайн хизмат кўрсатиш тизимини ва мижозлар билан муносабатларни бошқариш учун CRM-комплексини жорий этиш режалаштирилган.
Президент Шавкат Мирзиёев хизматларнинг мавжудлиги ва сифатини ошириш орқали аҳоли мобиллигини ошириш муҳимлигини таъкидлади.
