Ўзбекистон қурилиш вазири Ботир Зокиров Самарқандда бўлиб ўтган матбуот анжуманида акционерлари орасида ўғли ва турмуш ўртоғи ҳам бўлган «12-трест» кўп миллиардли давлат харидларини тендер савдоларисиз қўлга киритгани ҳақидаги хабарларга изоҳ берди, дея хабар қилди «Халқ сўзи».

Эслатиб ўтамиз, аввалроқ, Тошкентдаги Мустақиллик майдони ёнида жойлашган маъмурий бино реконструкцияси ва фаввора остига автотураргоҳ қуриш бўйича 431,5 млрд сўмлик лойиҳа тендер савдоларисиз «12-трест» компаниясига берилгани ҳақида ёзган эдик.

«Бу ташкилот 42 йиллик тарихга эга. Менимча, республикада бу каби қурувчи ташкилот бўлмаса керак. Ўзим шу ерда мен 20 йилдан ошиқ ишлаганман. Бу ташкилотда мени яқинларимам бор, устозларимам бор, 8 та ёки 10 та синфдошларим ҳам ишлаган. Бизда тартиб шуки, иш пайтида қариндошчилик ёки таниш билишчилик деган нарса йўқ. Дўстлик, қариндошчилик ҳаммаси ўз ўрнида. Бошқачасига иш юритиб бўлмайди», — деди вазир.

Ботир Зокировнинг айтишича, мазкур ташкилотда, Ҳукуматга ўтгандан буён, 11 йилдан бери ишлаб келмоқда. «12-трест» нимага тендерсиз кўп объектларни оляпти, деган саволларга жавоб берар экан, бу ташкилотнинг 51 фоизи давлат бошқарувида бўлгани, унинг ёки оиласининг компанияга умуман алоқаси йўқлигини таъкидлади.

«Кеча, Олий Мажлис бўйича ёзишяпти. Буни менга алоқаси йўқ. Олий Мажлисни объектларини, умуман Админстрацияга тегишли бўлган объектларни Қурилиш бошқарма бор, катта объектларни ўша қилади. Энди у объектда шароит бўлмагани учун „12-трест“ жалб қилинган», — дея маълум қилди Ботир Зокиров.

Қурилиш вазири «12-трест»нинг 42 йиллик тарихи борлигини, 1999 йилда Тошкентда содир бўлган терактларда зарар кўрган биноларни таъмирлаш ҳам ушбу компанияга топширилганини эслатиб ўтди.

«1999 йил теракт бўлганда Вазирлар Маҳкамаси 1 соатда «12-трест»ни жалб қилган. Ўша ерни қайтадан таъмирлаган. Худди шундай терактлардан биттаси Бош прокуратурада бўлганда, уни «12-трест» қабул қилиб олган. Эсимда Бош прокуратурада бўлган терактларда бутун бинони ёпиб қўйиб кечаси билан деворлардан одам қолдиқларини ишчилар скалпел билан қириб олган», — деди у.

Объектларни тендерсиз бериш масаласи тўғридан-тўғри унга боғлиқ эмаслиги, бу Вазирлар Маҳкамаси, президент қарори билан белгиланишини қайд этди. Вазир, шунингдек, «12-трест»да ҳам қийинчиликлар борлиги, у кўпинча тезкор вазиятларда жалб қилинишини айтиб ўтди.

«Бир нарсани тушунишларинг керак, 51 фоиз давлат улуши бўлгандан кейин менга унинг совуғи ҳам, иссиғи ҳам йўқ», — деди вазир.