Ўзбекистон Олий Мажлиси Сенати айрим йўналишларда самолётлар тури деярли бир хил бўлишига қарамасдан, авиачипталар нархлари ҳаддан зиёд баланд эканлигини маълум қилди.
Жумладан, бугунги кунда парвоз вақти 1 соат 10 дақиқа бўлган Тошкент-Олмаота йўналиши бўйича авиачиптанинг нархи фақат бир тарафга 4 млн 700 минг сўмни ташкил қилмоқда. Холбуки, парвоз вақти 3 соат 40 дақиқадан иборат Тошкент-Москва йўналиши бўйича авиачипта нархи 4 млн. 200 минг сўм, Тошкент-Рига йўналиши бўйича 2 млн 800 минг сўм (парвоз вақти — 5 соат 30 дақиқа), Тошкент-Нью Йорк йўналиши бўйича эса 6 млн 500 минг сўм (парвоз вақти — 12 соат) этиб белгиланган.
«Кўриниб турибдики, парвоз вақти 1 соат 10 дақиқа бўлган Тошкент-Олмаота йўналиши бўйича авиачиптанинг нархи ундан бир неча соат кўп парвоз қилинадиган йўналишлар учун белгиланган нархлардан сезиларли даражада юқоридир. Ушбу „тушунарсиз ҳолат“ фуқароларимиз учун қатор қийинчиликларни юзага келтирмоқда», — дейилади хабарда.
Сенат маълумотларига кўра, аҳоли билан жойларда ўтказилган мулоқотлар ва тегишли таҳлиллар шуни кўрсатдики, масъуллар нарх белгилашда фуқаролар тушиб қолган танловсиз, мураккаб вазиятдан инсофсизларча фойдаланмоқда.
«Зотан, Қозоғистонга чегарадан пиёда ёки автотранспорт воситасида ўтишга Қозоғистон томонидан пандемия сабабли тақиқ қўйилган ва бизнинг масъулларимиз ана шундай шароитда фуқароларимиз мажбурлигидан ҳам қиммат нархда чипта сотиб олаверади, деган ишонч билан ўз юртдошларининг манфаатларига зид ҳаракат (ёки ҳаракатсизлик) қилмоқда», — дея қайд этди парламент юқори палатаси.
Оқибатда ишлаш ёки бошқа мақсадларда қўшни Қозоғистонга кетаётган фуқароларимиз яна асоссиз ва ортиқча харажат қилишга мажбур бўлмоқда.
Юқоридагиларни инобатга олиб, Сенат Тошкент-Олмаота йўналиши бўйича авиачипталар ҳаддан зиёд юқори нархда сотилаётганлигини ўрганиб чиқиш ва натижаси борасида маълумотларни тақдим этиш юзасидан Ўзбекистон Монополияга қарши курашиш қўмитаси раиси Шохруҳ Шораҳмедовга сенатор сўрови юборди.
