Европа комиссияси 21 июнь кунидан бошлаб «рақамли яшил сертификат» кучга киришини эълон қилди. Ҳужжат Европа Иттифоқи мамлакатларида ҳаракатланиш эркинлигини қайта тиклашга имкон беради, деб хабар берди Euronews.

Сертификатнинг мавжудлиги саёҳатчининг маҳаллий аҳолига инфекция юқтириш хавфи йўқлигини англатади. Ҳужжатни синовдан ўтказиш 1 июндан бошланади.

Ҳужжат электрон қурилмаларга жойлаштирилади ёки қоғоз шаклида йўлга қўйилади. Европа адлия комиссари унинг мавжудлиги мажбурий эмаслигини таъкидлади. Бошқа мамлакатга келган одам, мисол учун, карантинда бўлишни афзал кўриши мумкин.

Сертификатда суғурталанганлик, турли мамлакатларда тан олинган вакциналар билан эмланганлик, коронавирус бўйича тестлар натижалари ва у инсон агар COVID-19 билан касалланган бўлса, соғайганлиги тўғрисида маълумотлар кўрсатилган бўлади.

Кўпгина Европарламент депутатлари коронавирус тестларини бепул ёки ҳеч бўлмаганда арзон қилишни талаб қилишди. Уларнинг фикрига кўра, сертификатни йўлга қўйиш нафақат миллий даражада, балки Европа Иттифоқи даражасида тартибга солиниши керак.